Presidenti rus, Vladimir Putin shprehu gatishmërinë e tij për t’u takuar me homologun ukrainas Volodymyr Zelensky, por vuri në dyshim legjitimitetin e tij si udhëheqës i Ukrainës.
“Jam gati të takohem me këdo, përfshirë Zelensky”, tha Putini në Forumin Ekonomik të Shën Petërburgut (SPIEF).
“Kush do ta nënshkruaje marrëveshjen e paqes?”, pyeti Putini duke vënë në dyshim, siç ka bërë në të kaluarën, legjitimitetin e Zelensky – sipas të cilit mandati 5-vjeçar i presidentit ukrainas ka përfunduar vitin e kaluar.
Megjithatë, udhëheqja ukrainase theksoi se zgjedhjet nuk mund të zhvilloheshin për shkak të gjendjes së jashtëzakonshme – si rezultat i sulmit të Putinit ndaj Ukrainës.
Shumë vëzhgues ndërkombëtarë i konsiderojnë zgjedhjet e Rusisë as të lira dhe as të drejta.
Gjithashtu, në Forumin Ekonomik të Shën Petërburgut (SPIEF), Putini bëri thirrje për vazhdimin e negociatave të drejtpërdrejta midis Moskës dhe Kievit.
“Bisedimet e zhvilluara dy herë këtë vit, në Stamboll – nën ndërmjetësimin turk duhet të rifillojnë pas 22 qershorit”, tha ai.
Sipas Putinit, takimet e fundit kanë arritur rezultate në fushën humanitare, duke përfshirë shkëmbimin e të burgosurve dhe trupave të ushtarëve të vrarë.
“Ne kemi dorëzuar tashmë 500 pengje dhe kemi marrë 400 në këmbim”, tha Putini, duke iu referuar shkëmbimit të vazhdueshëm të 1 200 të burgosurve – të rënë dakord në fillim të qershorit, në Stamboll.
Gjatë ditëve të fundit, palët ndërluftuese kanë raportuar vazhdimisht shkëmbime, megjithëse nuk kanë dhënë shifra specifike. Rusia ka zhvilluar një luftë në shkallë të plotë kundër Ukrainës për më shumë se tre vjet.
