Prokurorët amerikan mund të kenë zbuluar një mënyrë pa pasur nevojë për ndihmën e kompanisë Apple, për të zhbllokuar celularin Iphone të një prej atentatorëve të sulmit me armë në San Bernardino, që shkaktoi vdekjen e 14 personave dhe plagosjen e 22 të tjerëve.
Prokurorët kanë deklaruar se një palë e tretë është vetë-ofruar për të zhbllokuar celularin, dhe kjo ka bërë që gjyqtari i çështjes të kërkojë shtyrjen e seancës dëgjimore, me shpresën që kjo të ndodhë. Departamenti amerikan i drejtësisë në një komunikatë për shtyp theksoi se interesi i vetëm i këtij institucioni është përftimi i informacioneve të nevojshme nga telefoni celular i Faruk, dhe se janë optimistë që kjo teknike e re do të funksionojë, transmeton OraNews.
Qeveria amerikane deri të hënën këmbëngulte se nuk kishte asnjë mënyrë për të pasur akses në telefonin e përdorur nga Rizvan Faruk, njëri prej dy agresorëve të masakrës së San Bernardinos, dhe prej kohësh autoritetet i kërkonin kompanisë Apple të krijonte një program që mund të lejonte aksesin në aparatet celularë.
Por korporata multi-teknologjike ka refuzuar fuqimisht duke theksuar se një program i tillë minon sigurinë e të gjithëve. Drejtori ekzekutiv i Apple Tim Cook deklaroi se është e paprecedentë që një qeveri të detyrojë një kompani të krijojë një produkt të ri për të mbështetur autoritetet. Lajmi që një palë e tretë ka prezantuar një mënyrë për të zhbllokuar iphonin është pritur me skepticizëm nga komuniteti i teknologjisë.
