Një studim i një instituti zviceran ka zbuluar për herë të parë sekretin e vrimave që krijohen në djathin e famshëm Emmental, i njohur për flluskat që përmban në brendësi dhe që e bëjnë të dallueshëm në gjithë botën.
Studiuesit thonë se shkaku janë pjesëzat e sanës (lloj bime), që përfundojnë në enët ku mbahet qumështi. Aq e vërtetë është kjo, saqë vrimat e Emmentalit janë zvogëluar me përdorimin e procedurave që pastrojnë qumështin në stabilimentet e prodhimit. Kalimi nga mjelja me dorë e qumështit, në proces automatik, ka bërë që papastërtitë, mes të cilave pjesëzat e thata të sanës, të mos hyjnë më në enët e qumështit. Për pasojë, ka më pak vrima në Emmentalin e sotëm zviceran.
