Tre persona janë arrestuar në Tiranë nga policia pasi kanë shtënë me armë në një restorant në Mullet. Pas këtij incidenti ata janë ndjekur nga policia dhe në zonën e rrugës së Elbasanit kanë hedhur pistoletën me të cilën kanë qëlluar.
Policia bën me dije se shërbimet e Komisariatit të Policisë Nr 1, bënë të mundur kapjen në flagrancë të tre shtetasve:
Ermal Kadilli, 36 vjeç, banues Tiranë
Dritan Masha, 36 vjeç, banues Tiranë
Dritan Ago, 35 vjeç, banues Tiranë
Sipas policise, tre shtetasit e sipërpërmendur udhëtonin në një automjet tip Jeep, me targa AA 425 ON dhe dyshohet të kenë qëlluar me armë pasi kanë dalë nga një resort (bar -restaurant)në Mullet.
“Policia ka marrë informacion dhe është vënë në ndjekje te tyre. Rreth orës 14:40, janë konstatuar në rrugën e “Elbasanit”, nga patrulla e dytë pasi nuk i kanë qëndruar patrullës policore në vendin e njohur si rreth rrotullimi TEG-ut”, thane burimet.
Sipas tyre, në momentin e ndalimit këta shtetas kanë kundërshtuar punonjësit e policisë dhe menjeherë kanë hedhur jashtë në tokë sendin e kundraligjshëm, një armë zjarri pistoletë tip TT.
“Dyshohet se arma i përkiste shtetasit Ermal Kadilli, e cila u sekuestrua në cilësinë e provës materiale. Në vendngjarje (Mullet)janë gjetur dhe sekuestruar tre gëzhoja. Policia ndodhet në vendngjarje dhe po punon për sqarimin e plotë të rrethanave të ngjarjes”, kane thene burimet e policise.
