“The Washington Post” raporton këtë të dielë, më 31 gusht, se është përpiluar një plan për Gazën pas luftës, i cili po qarkullon brenda administratës së Donald Trump. Ky plan, i ndërtuar mbi premtimin e ish-presidentit për të “marrë kontrollin” e enklavës, do ta kthente Gazën në një administratë nën kujdestarinë e SHBA-ve për të paktën 10 vjet, ndërsa transformohet në një zonë turistike luksoze dhe një qendër e avancuar e industrisë dhe teknologjisë së lartë.
Dokumenti me 38 faqe, i parë nga “The Washington Post”, përfshin të paktën një zhvendosje të përkohshme të mbi 2 milionë banorëve të Gazës, përmes largimeve “vullnetare” drejt një vendi tjetër ose në zona të mbrojtura brenda vetë enklavës gjatë fazës së rindërtimit.
Për ata që zotërojnë tokë, do të marrin një token dixhital në këmbim të të drejtës për të përmirësuar pronën e tyre, i përdorshëm për të financuar një jetë të re diku tjetër ose për t’u kthyer më vonë në një apartament në njërën prej 6 deri në 8 “qyteteve të zgjuara me bazë intligjencën artificiale” që do të ndërtohen në Gaza.
Çdo palestinez që do të zgjidhte të largohej do të merrte:
-një pagesë në dorë prej 5 mijë dollarësh,
-ndihmë për katër vjet me qira në një vend tjetër,
-si dhe një vit ushqim të siguruar.
Sipas planit, çdo largim individual nga Gaza do t’i kursente fondit rreth 23 mijë dollarë, krahasuar me koston e strehimit të përkohshëm dhe të ashtuquajturave shërbime të “mbijetesës jetike” në zonat e sigurta për ata që zgjedhin të qëndrojnë.
