Shkencëtarët kanë arritur ta gjurmojnë në lashtësi gjenezën e krijimit të multimiliarderëve dhe pabarazisë sociale.
Në studimin e realizuar së fundi, ata tregojnë se përpara mijëra vitesh ishte përdorimi i parmendës me qetë dhe kuajt, ai që krijoi ekuivalentin e sipërmarrësve pasanikë të ditëve tona.
Kërkimi i publikuar në revistën “Nature” përbën edhe përpjekjen e parë për të vlerësuar sesi u krijuan dallimet e mëdha pasurore në mesin e paraardhësve tanë.
Ato filluan kur bujqësia krijoi idenë e pronësisë së tokës, edhe pse pabarazia që rezultoi nga mbjellja dhe korrja e kulturave nuk ishte shumë e thellë.
Vetëm me përdorimin e kafshëve nisën të shfaqen ndasitë serioze në radhët e shoqërisë, lidhur me pasurinë, duke krijuar përfundimisht ekuivalentin e lashtë të miliarderëve të sotëm, që zotërojnë ishuj e avionë privatë.
Për të matur pasurinë relative në një shoqëri, ekipi ka punuar me arkeologë, të cilët studiojnë 62 shoqëri të ndryshme në Europë, Azi dhe Amerikën e Veriut. Disa prej këtyre shoqërive ishin deri në 10.000-vjeçare, e hulumtimet përfshijnë deri edhe Babiloninë e lashtë e Pompein.
Studiuesit analizuan përmasat e shtëpive në këto vende dhe i kanë përdorur ato si tregues të ndryshimit të pasurisë që ka ekzistuar atje në çdo kohë./a.c
