Identifikohet trupi pa pajetë që u gjet një ditë më parë i groposur në zonën e Dajtit. Sipas policisë, trupi i pajetë i përket shtetasit Vasil Biba, nga Pogradeci.
Ky shtetas rezulton i zhdukur dy muaj më parë, dhe rezulton kontigjent i njohur për policinë pasi ndaj tij janë depozituar një sërë denoncimesh për mashtrim financiar.
Viktima, që u gjet i ekzekutuar me dy plumba në trup, kishte mashtruar dhjetëra qytetarë duke i shitur të njëjtin apartament shumë personave.
Kjo është edhe pista kryesore ku grupi hetimor ka përqendruar veprimet për zbardhjen e ngjarjes.
Për momentin nuk ka asnjë të dyshuar, pasi lista e personave që kanë bërë denoncim ndaj viktimës 36-vjeçar është mjaft e gjatë.
Viktima rezulton një person me precedent penalë, i dënuar dy herë nga Gjykata gjatë vitit 2015, për fshehje të të ardhurave si administrator i një kompanie private dhe për drejtim të mjetit pa patentë.
Për të dy veprat, ai ishte dënuar me dy vjet burg, por për shkak të gjykimit në gjendje të lirë ishte fshehur dhe rezultonte i shpallur në kërkim.
