Tre kompani të mëdha kanë marrë pjesë deri më tani në ankandin për emrin e stadiumit të ri që është ndërtuar në Tiranë. Deri më tani, Shqiptarja.com mëson se kanë marrë pjesë Bolv Oil, Vodafone dhe Sigal.
“Arena Kombëtare” siç quhet momentalisht do të ketë një tjetër emër. FSHF hapi një ankand në datën 22 korrik për emrin e stadiumit ku ftoi të gjitha ato kompani të interesuara që t’i vinin emrin e tyre stadiumit të ri, të paraqisnin ofertat. Një proces ky që u shoqërua me debate të shumta më pas por FSHF thotë se arsyet se pse u hap ky ankand janë vetëm financiare pasi stadiumi duhet të mirëmbahet.
Shitja e të drejtave të emrit do të bëhet për një afat minimal prej 5 vitesh dhe çmimi dysheme duhet të jetë 600 mijë euro në vit. Pra cilado kompani që dëshiron t’i vë emrin e saj “Arenës Kombëtare” duhet patjetër të paguajë 3 milionë euro për afat 5-vjeçar.
Në momentin që u hap ankandi Federata sqaronte se kompania duhet të kishte një emër të mirë dhe xhiro prej 10 mln euro në vit.
“Arena Kombëtare” do të inaugurohet në 17 nëntor në ndeshjen ndaj Francës të vlefshme për kualifikueset e Euro 2020. Pritet që në ceremoninë e inaugurimit të vijnë edhe drejtuesit e futbollit botëror President ii FIFA-s Infantino dhe a ii UEFA-s Ceferin.
Stadiumi ka një kapacitet prej rreth 22 mijë tifozësh dhe është i kushteve më bashkëkohore. Gjatë ditëve të fundit është testuar edhe impianti i ndriçimit dhe përpara duelit me kampionët e botës do zhvillohet edhe një ndeshje testuese.
g.kosovari
