Ambasada amerikane bën thirrje që të plotësohen vendet vakante në Këshillin e Lartë të Gjyqësorit dhe Këshillin e Lartë të Prokurorisë.
Selia diplomatike amerikane thotë se, shumë patriotë kanë aplikuar deri më tani për këto poste, por edhe më shumë janë të nevojshëm për plotësimin e tyre.
Për këtë u bëhet thirrje profesorëve të kualifikuar që të aplikojnë dhe të bëhen pjesë e këtyre institucioneve të rëndësishme.
Në Këshillin e Lartë të Gjyqësorit dhe Prokurorisë, dy institucione të reja të reformës në drejtësi, ka ende vende të pa plotësuara për shkak se avokatia dhe shoqëria civile nuk kanë paraqitur emrat e profesionisteve me aplikantë.
DEKLARATA E PLOTË
Shumë shqiptarë patriotë kanë aplikuar tashmë për të shërbyer në Këshillin e lartë Gjyqësor dhe në Këshillin e Lartë të Prokurorisë, por nevojiten edhe më shumë ekspertë. Ne nxisim profesorë të kualifikuar që të aplikojnë për të qenë pjesë e këtyre institucioneve të rëndësishme.
Kujtojmë që dje zyrtari i DASH, Hoyt Yee deklaroi se pret që vettingu të nisë në shtator dhe se SHBA do të asistojë procesin.
“Ne kemi synim të vazhdojmë me mbështetjen që kemi dhënë, përmes ambasadës, përmes agjencive të ndryshme përfshirë USAID-in, për të dhënë ekspertizë teknike, për të këshilluar, për forcimin e institucioneve, për të ndihmuar me krijimin e Byrosë Kombëtare të Hetimit për shembull, për të ndihmuar me procesin e vetingut që ne shpresojmë të fillojë në vjeshtë. Ne synojmë të luajmë rolin që u kemi premtuar partnerëve tanë në qeveri dhe në partitë politike. Aty ku ata duan që ne t’i ndihmojmë, ne jemi të gatshëm të ndihmojmë, jo vetëm me fjalë, por me veprime dhe ekspertizën tonë”, tha Yee
/a.ç
