Viktor Ymeri, një prej njerëzve më problematikë në Vlorë festoi ndërrimin e viteve pranë familjes sepse Gjykata e Elbasanit i dha lirinë.
Atij i kishin mbetur dhe disa muaj burg nga dënimi prej 25 vitesh për vrasje, por gjyqtarja Enkeleda Kapedani vendosi që të lirohet, duke marrë parasysh edhe ditët e punës së kryera brenda burgut të Peqinit.
Dy ditë pas këtij vendimi, Prokurori vendosi që ta ankimojë vendimin në Gjykatën e Apelit të Durrësit.
Në vendimin e siguruar nga “Panorama”, thuhet se vetë prokurori ka qenë dakord me njohjen e ditëve të punës, kërkesë nga Viktor Ymeri, por “pavarësisht kësaj për shkaqe të paqarta ai ka paraqitur ankim kundër këtij vendimi, duke refuzuar që të bëjë ekzekutimin e vendimit, në kundërshtim me atë që kishte urdhëruar vendimi gjyqësor”.
Sipas organit të akuzës, Viktor Ymerit i janë shuar një muaj e 23 ditë nga dënimi i mbetur.
Viktor Ymeri është daja i Edison Harizaj, i cili u vra pas një atentati në Durrës.
Ai konsiderohej nga policia dhe prokuroria si një nga njerëzit më të afërt të Gazmend Brakës, (Gaxhait) i dënuar me burgim përjetë, pasi së bashku në qershor të vitit 1999, kanë ekzekutuar me dhjetra plumba kallashnikovi Arben Pajën dhe Ilir Xhungën, të cilët ishin pjesë e një fraksioni tjetër kriminal në Durrës.
Për këtë ngjarje policia e Durrësit në atë kohë arrestoi brenda shtëpisë së një doktori në Durrës, Gazmend Brakën dhe Viktor Ymerin. Sipas burimeve nga policia e Vlorës dyshohet se Ymeri të jetë dhe daja i Edison Harizaj, i vrarë me rreth 50 plumba në ngjarjen e 7 nëntorit 2018 në zonën e Plepave në Durrës. Harizaj dhe shoku i tij Genci Caci u qëlluan vetëm 7 ditë pasi Gjykata e Apelit në Durrës projektoi lirimin nga qelia të të afërmit të tyre Viktor Ymeri, për të cilin në 31 tetor 2018, ka vendosur ti rrëzojë dënimin me burgim të përjetshëm të dhënë në 23 qershor 2017 nga gjykata e Durrësit, dhe ta dënojë atë përfundimisht me 25 vite burgim.
Vendimi i Gjykatës së Apelit që e ktheu burgimin e përjetshëm në 25 vite burg. Kurse lirimi vjen pasi koha e përllogaritjes së shlyerjes së këtij dënimi, sipas gjykatës së Apelit, Viktor Ymerit, i fillon në 29 qershor 1999, dhe që prej kësaj dite e deri më tani, pjesa më e madhe e dënimit prej 25 viteve burgim thuajse se është kryer.
/a.r
