Policia e Vlorës ka zbardhur ngjarjen e ndodhur një ditë më parë në Selenicë ku një 56-vjeçar humbi jetën për shkak të shpërthimit të bombolës së gazit në oborrin e tij.
Një ditë më parë ngjarja u raportua si aksidentale, ndërkohë sot policia ka arrestuar djalin e viktimës, M. G., 23 vjeç, i cili nga hetimet ka rezultuar se ka vrarë të atin, shtetasin, D.G., 56 vjeç duke vendosur lëndë eksplozive në sobën me gaz.
23-vjeçari dyshohet se për shkak të dhunës së vazhdueshme që babai ka ushtruar ndaj tij, ka vendosur lëndë plasëse në sobën me gaz, në oborrin e banesës, nga shpërthimi i së cilës humbi jetën 56-vjeçari”, tha policia.
Në cilësinë e provës materiale janë sekuestruar: mekanizmi elektrik me të cilin është realizuar shpërthimi, 25 granata dore difensive, 37 kallëpe me lëndë plasëse tritol (me peshë 400 gr. secila), 43 kapsolla detonatore, 5 ndezësa granatash, 1 armë zjarri pushkë, 1 celular, 2 thika, 310 fishekë luftarakë, 12 krehra për armë zjarri, 2 radio marrëse-dhënëse, kapuça dhe veshje për mbulimin e fytyrës dhe mjete për punime elektrike me ngjitje.
