Neni që dënon gazetarët në rast se cilësohen se po ushtrojnë influencë të papërshtatshme mbi punën e prokurorëve, është caktuar në dy projektligje të paketës së Reformës në Drejtësi.
Neni i zbuluar në projektligjin “Për organizimin dhe funksionimin e institucioneve për të luftuar korrupsionin dhe krimin e organizuar” rezulton të jetë vendosure edhe në projektligjin “Për organizimin dhe funksionimin e Prokurorisë në Shqipëri”.
Çështja bëhet akoma më e rëndë për faktin se projektligji i Prokurorisë është miratuar nga Komisioni i Posaçëm i Reformës në Drejtësi dhe është depozituar në Parlament. Nisma në fjalë, e miratuar vetëm me votat e maxhorancës në Komisionin e Reformës, është regjistruar në Parlament me numër protokolli 2096, më datë 29.06.2016.
NDËSHKIMI
Në projektligjin e organizimit dhe funksionimit të Prokurorisë, neni i që penalizon gazetarët është emërtuar si neni 6 dhe flet për pavarësinë e prokurorëve. Por neni i përfshirë në projektligjin e Prokurorisë është ende më evaziv në përcaktimin e masës së ndëshkimit, pasi përveç mediave, që në këtë rast cilë- sohen si “mjetet e informacionit”, parashikon që ndëshkimi me burg deri në tre vjet të jetë edhe për “mjetet e tjera”.
Ky term lë mundësinë që “ndikim i papërshtatshëm” në punën e Prokurorisë të cilësohen dhe mesazhet në rrjetet sociale “Facebook”, “Tëitter”, apo çdo lloj rrjeti tjetër etj. “Çdo lloj ndikimi i papërshtatshëm mbi punën e prokurorëve dhe veprimtarinë e tyre në çështje konkrete, i ushtruar përmes autoritetit publik, mjeteve të informacionit apo me çdo lloj mjeti tjetër apo personave të tjerë, që cenon pavar- ësinë e prokurorëve në ushtrimin e detyrës së tyre, është i ndaluar dhe dënohet sipas ligjit”, thuhet në nenin 6, pika 3 e projektligjit të Prokurorisë.
PROCESVERBALI
Në mbledhjen e 11 korrikut, në të cilën mungonte opozita, deputetët e maxhorancës në Komisionin e Reformës në Drejtësi as që e kanë përmendur fare pikën 3 të nenit 6, në të cilën dënohen mediat dhe çdokush që mund të kritikojë institucionin e Prokurorisë.
Madje, deputetja e Partisë Socialiste, Vasilika Hysi, ka qenë më e shqetësuar që të vendosë në projektligj parashikimet që prokurorët të mos diskriminojnë komunitetin LGBT për orientimin e tyre seksual dhe gjinor, duke mos përmendur fare rastin e dënimit të mediave.
“Për të qenë koherentë, duhet që pas ‘orientimit seksual’ të shtohet identiteti gjinor. Është protokolli 12 i konventës”, ka thënë deputetja Hysi, duke folur për nenin 8. Ndërkohë që pas sqarimit teknik, Fatmir Xhafaj i ka hedhur në votim nenet.
PROCESVERBALI I 11 KORRIKUT 2016
NENI 6, “PAVARËSIA E PROKURORËVE”
Ulsi Manja: Në paragrafin e parë të nenit 6 është përmendur parimi i paanshmërisë, por në vijim të projektligjit, ai nuk është parashikuar si parimet e tjera, pra thuhet: “…bazuar në parimet e ligjshmërisë, objektivitetit dhe paanshmërisë”. Kur flitet te parimet pastaj, parimi i paanshmërisë nuk është trajtuar në projektligj. A është nevoja të trajtohet në projektligj edhe parimi i paanshmërisë, si parim i rëndësishëm?
Artan Hoxha (ekspert ligjor): Paanshmëria në vetvete është pjesë e pavarësisë, domethënë është segment. Kur flasim për pavarësinë, pjesë e pavarësisë është edhe paanshmëria, e cila ka të bëjë me raportin e prokurorit në lidhje me çështjen, kurse pavarësia ka të bëjë me raportin që ka prokurori, në tërësinë e vet, me institucionet dhe me subjektet e tjera të procesit penal. Paanshmëria është element i pavarësisë dhe janë nenet 15, 16, 17 të Kodit të Procedurës Penale. Përmendja “në pavarësi”, mendoj se e plotëson edhe elementin e paanshmërisë.
Ulsi Manja: Dakord.
Vasilika Hysi: Për të qenë koherentë, duhet që pas “orientimit seksual” të shtohet identiteti gjinor. Është protokolli 12 i konventës.
Fatmir Xhafaj: Pra, dakord me nenet 6 dhe 7.
Panorama
