Në linjë me parimin e taksimit të ndershëm kush fiton me pak paguan më pak si edhe për të rritur përfitimet për ata qe kanë paga të ulëta, Partia Socialiste ka sjellë një propozim të ri në Kuvend.
Deputetja e Partisë Socialiste Blerina Gjylameti propozoi në mbledhjen e sotme të Komisionit parlamentar të ekonomisë ku u prezantua Paketa Fiskale për buxhetin 2019, rritjen e pragut të pagës minimale që tatohet me qëllim mbrojtjen e pagave më të ulëta.
“Mbrojtje të pagave më të ulëta duke marrë parasysh faktin që me ngritjet që kanë patur ndër vite kanë hyrë në fashën e pagave që paguajnë tatim mbi të ardhurat”, tha deputetja Gjylameti.
Në fjalën e saj në komision, Gjylameti theksoi se përmes propozimeve të kësaj mazhorance për Buxhetin 2019 synohet edhe ulja e ngarkesës fiskale për të punësuarit, duke e rritur fashën e të ardhurave, që tatohen me normën 13%, nga 130.000 lekë/muaj në 150.000 lekë/muaj. Nëpërmjet kësaj mase synohet të ulet barra tatimore për rreth 15.400 punëmarrës jo vetëm në sektorin publik, por shumica në sektorin privat.
Një tjetër propozim i Gjylametit ishte edhe për të nxitur zhvillimin e bujqësisë. Deputetja socialiste propozoi heqjen e TVSH për inputet bujqësore në kuadër të zbatimit të angazhimeve konkrete të ndërmarra për të nxitur një nga sektorët kryesorë të ekonomisë
Paketa e re fiskale parashikon lehtësira edhe për bizneset. Deputetja Gjylameti theksoi se përmes paketës që i është paraqitur Kuvendit për miratim, synohet lehtësim ibarrës fiskale për 20 mijë biznese ose mbi 50 mijë investitorë të kapitalit nga ulja e normës së tatimit mbi dividentin nga 15% në 8%. Kjo masë vlerësohet të ketë impakt pozitiv në të ardhurat buxhetore të vitit 2019 me rreth 4.5 miliardë lekë.
Gjylameti propozoi dhe uljen e tatimit në 0% për dividentin që riinvestohet.
Në propozimet e deputetes Gjykameti ishin edhe rritja e rentës minerare në 9 % për të gjithë industrinë nxjerrëse per mineralet/ produketet nxjerrëse për eksport me qëllim që të nxisim përpunimin në vend dhe rritjen e vlerës së tij për eksport , duke dekurajuar eksportin e mineraleve të papërpunuara.
Paketa e re fiskale që shoqëron projektbuxhetin e vitit 2019, theksoi Gjylameti, tregon angazhimin konkret që ka ndërmarrë qeveria shqiptare në drejtim të zbatimit të një programi ambicioz reformash, të cilat kanë si qëllim sigurimin e një rritjeje të qëndrueshme ekonomike, vazhdimin e luftës kundër informalitetit, zhvillimin e sistemeve të teknologjisë së informacionit të administratave fiskale për të rritur efiçencën e punës, zhvillimin e mëtejshëm të kuadrit legjislativ fiskal, si dhe forcimin e burimeve njerëzore të administrates, rritjen e punëzënies dhe përmirësimin e mirëqenies së qytetarëve shqiptarëve.
Projektligjet financiare paraqesin në mënyrë të qartë dhe të detajaur politikat tatimore që do të ndiqen gjatë vitit 2019, si në drejtim të zgjerimit të të ardhurave tatimore, ashtu edhe për nxitjen e përmirësimin e klimës së biznesit, duke mos anashkaluar edhe analizimin e risqeve dhe problematikat që mund të hasen në zbatimin e tyre.
Propozimet do të diskutohen gjatë diskutimit nen për nen në Komisionin e Ekonomise dhe Financave në ditët në vijim.
/b.d
