Vettingu në polici. Të parët do të jenë 300 oficerë me grada të larta për spastrimin e policisë nga korrupsioni. Kontrolli do të nisë me drejtorin e Përgjithshëm Haki Çako.
Ky proces do të kalojë në sitë të gjitha pasuritë dhe të ardhurat e policëve në mbarë vendin. Referuar deklarimeve të ardhura nga Open data Albania bëhen publike të dhënat për pasurinë e disa prej kryepolicëve.
Deklarimi karakterizohet nga të ardhurat në vit, pasuri të fituara gjatë vitit dhe shpenzimet, shkruan gsh.
Haki Çako
Gjatë vitit 2016 rezulton se të ardhurat nga paga si drejtor i përgjithshëm është 1 533 692 lekë. Personat e përfshirë në familje janë gruaja dhe vajza, Alketa dhe Altea. E shoqja rezulton të fitojë të ardhura nga paga në autoritetin shëndetësor rajonal dhe në drejtorinë rajonale të SSH 630 201 lekë. Familja Çako ka në zotërim një apartament në Durrës me vlerë 30 mijë euro, ndërsa mjeti i tij ka vlerë 7 mijë euro. Në llogari bankare, gjendje Çako ka 37 mijë euro.
Ardi Veliu
Drejtori i Drejtorisë Vendore të Policisë Tiranë ka përfshirë vetëm bashkëshorten, Matildën në deklarimin e pasurisë. Nga paga e tij në 2016-ën të ardhura janë 1 057 081 lekë. Ndërkohë e shoqja në nivel akademik në fakultetin ekonomik të universitetit Ismail Qemali merr një pagë prej 1171756 lekë. Gjendja e depozitës bankare rezulton 730 608 lekë.
Gentian Shehaj
Kreu i drejtorisë së policisë së qarkut Vlorë rezulton të ketë deklaruar pasurinë fillestare që në 2012. Ka deklaruar pasuri të paluajtshme një apartament 2+1 85 m katror i blerë rreth 40 mijë euro, nga këto 26 mijë euro të marra kredi. Për gjendjen kesh ka deklaruar se nga puna e kryer nga 2008-2012 shumën 2 mijë euro. Pas 2012, kur ishte drejtor policie në Dibër rezulton se të ardhurat nga paga është 621 830 lekë.
Alfred Çepe
Drejtori i policisë së Durrësit rezulton të ketë deklaruar pasurinë që nga 2013. Sa i përket pasurisë së paluajtshme rezulton të jetë 50% pronar i një apartamenti me sipërfaqe 101 metër katror e të blerë me kredi. Gjendja e llogarisë bankare në një bankë të nivelit të dytë është 1571 28 euro. Bashkëshortja Silda Çepe në një bankë të nivelit të dytë rezulton të ketë 50% të 1000 eurove. Në një bankë tjetër ka 530 68 euro. Rezulton të ketë marrë kredi bankare në një banke të nivelit të dytë për blerjen e një apartamenti 25 mijë euro.
Alfred Çepe është pronar i një makinë tip BMV i vitit 2001, ndërsa e shoqja ka një makinë “Benz A Clas” me vlerë 4500 euro. Nga paga si punonjës i policisë të ardhurat janë 11 67 543 lekë. Po ashtu, bashkëshortja e tij figuron trashëgimtare e një apartamenti në Vlorë me sipërfaqe 110 m2.
Alber Nushi
Referuar të dhënave të pasurisë të deklaruara së fundmi, rezulton se Albert Nushi, aktualisht drejtor i Policisë së Fierit është përfitues i 4000 m katrorë tokë në Lushnjë, përfituar sipas ligjit nr.7051 për të cilën nuk ka marrë akoma certifikatën e pronësisë. Të përfshirë në këto deklarime janë bashkëshortja e tij, Alketa Nushi, djali Arjon Nushi dhe vajza Anisa Nushi. Bashkëshortja rezulton të jetë bashkëpronare në një biznes restorant-fastfood. Djali rezulton të jetë bashkëpronar i një makine tip ‘Ford’ blerë në vitin 2013. Ndërsa të ardhurat e bashkëshortes nga trajtimi në bazë të VKM, nr. 183 “Për kompensim për privatsionet dhe humbjet që i shkakton punonjësit të Policisë së Shtetit për shkak të nevojave të punës dhe të detyrës”, shkojnë në shumën 178 300 lekë. Të ardhurat e djalit nga paga e Komisariatit të Policisë Vlorë shkojnë në shumën 571 844 lekë dhe të ardhurat e tij nga paga në Drejtorinë e Policisë së shtetit kapin vlerën 106 086 lekë. Albert Nushi rezulton gjithashtu të jetë pronar i një shtese në pallatin 1337 në katin e dytë pranë apartamentit të prindërve. Ndërsa djali i tij rezulton të jetë pronar i një tjetër makine tip “Benz”.
