Një shqiptar u gjet i vrarë mbrëmjen e së dielës në Diksmuide të Belgjikës. I riu 28-vjeçar i identifikuar si Ilir S., u gjet i ekzekutuar me 6 plumba në mes të rrugës, pranë motorit të tij të parkuar.
Të hënën autoritetet policore arrestuan një të dyshuar, që siç shkruajnë mediat belge, është vjehrri i të riut shqiptar, Stephane V. 54-vjeçari mësohet se e ka mohuar krimin.
Dyshja duket se nuk kishin një marrëdhënie të mirë për shkak të “reputacionit” të dhëndrit të tij dhe personat me të cilët shoqërohej.
Mediat belge shkruajnë se Iliri nuk ishte i martuar ligjërisht, por në një marrëdhënie me Melanie. Çifti kishte dy fëmijë, një nga një lidhej e mëparshme e gruas, si dhe një vajzë 5-vjeçare, fryt i marrëdhënies së tyre.
Mbrëmjen e së dielës, autori i dyshuar rezulton se kishte pasur një debat me dhëndrin e tij pikërisht në vendin ku u gjet i vrarë. Por 54-vjeçari para hetuesve pretendoi se Iliri ishte gjallë kur u largua.
Përveç mosmarrëveshjeve mes dyshes, shkaqet e ngjarjes së rëndë për momentin mbeten të paqarta. Sa i përket origjinës së shqiptarit ajo nuk specifikohet në mediat belge, por mësohet se 28-vjeçari jetonte prej kohësh në Koekelare.
/a.r
