Polica e Vlorës zbardh dhe dokumenton të plotë ngjarjen e ndodhur një ditë më parë, kur shoferi i një taksie Bashkim Guraj, 70 vjeç mbeti i lënduar, pasi u qëllua me pistoletë imituese nga dy pasagjerët e tij.
Gazetari Enrik Mehmeti konfirmon për “BalkanWeb” se shoferi ka marrë vetëm një plagë djegie në shpatull, ndërsa dyshohet se autorët kanë pasur qëllim ta grabisnin.
Sakaq policia e Vlorës ka arritur të zbardhë të gjithë dinamikën e ngjarjes dhe të identifikojë autorët, që fillimisht janë konfliktuar me taksistin e më pas e kanë qëllur me armën imituese.
Dy autorët, tashmë të identifikuar nga Policia, konkretisht, shtetasit K.B., dhe G.Ç., të cilët ishin pasagjer në mjetin taksi me drejtues shtetasin B.G., dhe udhëtonin në aksin rrugor Himarë-Palasë, në momentin që kanë vënë re një pikë kontrolli të ngritur nga Policia në vendin e quajtur ”Ura e Palasës”, kanë detyruar nën kërcënimin e armës imituese shtetasin B.G., të ndërronte drejtimin e rrugës.
Drejtuesi i mjetit nuk ka pranuar dhe janë konfliktuar me njëri-tjetrin, ku njëri nga autorët e ka qëlluar me armën imituese duke e lënë të dëmtuar.
Të dy shtetasit e lartpërmendur i kanë marrë vetëm çelësat e mjetit dhe janë larguar duke përfituar edhe prej terrenit dhe errësirës.
Nga hetimet e kryera nga ana e Policisë ka rezultuar se të dy këta shtetas janë edhe autorët e ngjarjes së ndodhur më datë 12.12.2017, në hyrje të Orikumit, ku mbeti i plagosur një shtetas.
Ndërkohë Policia po vijon intesivisht punën për kapjen dhe ndalimin e tyre.
Materialet do ti referohen Prokurorisë Vlorë, ndaj shtetasve K.B. dhe G.Ç., për veprën penale ”Heqja e paligjshme e lirisë”, e parashikuar nga neni 110/2 i Kodit Penal. /b.d
