Delegacioni i Bashkimit Evropian në vendin tonë ka zbardhur detaje nga vizita e Federica Mogherinit në Tiranë ditën e nesërme.
Në një njoftim zyrtar, institucioni në fjalë thekson se përfaqësuesaja e lartë e BE do të mbajë pasditen e së premtes një fjalim para studentëve të Universitetit Politeknik. Vizita e Mogherinit në UPT do të zhvillohet në orën 17:30 dhe pritet të zgjasë 60 minuta.
Ndërkohë, mbrëmjen e nesërme zyrtarja e lartë e Bashkimit Evropian pritet të takohet me kryeministrin Edi Rama.
Sipas të njëjtave burime Mogherini dhe Rama do të mbajnë sëbashku një konferencë për shtyp në orën 20:15 nga godina e Këshillit të Ministrave ndërsa nuk do të ketë seancë pyetje-përgjigjesh me gazetarët. Mësohet se Mogherini do të takohet edhe me presidentin Nishani dhe përfaqësues të forcave të tjera politike.
Vizita e Federica Mogherinit vjen si pjesë e turit ballkanik të zyrtarës në fjalë që ka nisur prej ditës së djeshme.
/JAVANEWS/b.d
