Indrit Taullai, anëtari i Bandës së Durrësit, është arrestuar në Kosovë për llogari të Interpol Tirana. 45-vjeçari kishte hyrë në Kosovë të shtunën në datën 5 Dhjetor, por një ditë më vonë u arrestua në Prizren, menjëherë sapo Interpol Tirana dërgoi urdhrin për arrestimin e tij, me akuzën e grupit të strukturuar kriminal.
Zyrtarisht Policia e Shtetit nuk ka dhënë detaje nga arrestimi, pasi po vijojnë hetimet. Por Televizioni Klan mëson se Indrit Taullai është i dyshuar për një ngjarje kriminale që ka ndodhur në Durrës.
Indrit Taullai është një emër i njohur, pasi ka qenë i dënuar me 25 vite burg, por u lirua nga Gjykata e Lartë me argumentin se vuante nga një sëmundje e rëndë.
Banda e Durrësit ku bënte pjesë 45-vjeçari ka funksionuar që prej vitit 1994 dhe është autore e një sërë vrasjesh që kanë ndodhur në Durrës e Tiranë, duke filluar nga ekzekutimi i Dritan Sallakut, Vuron Curri, Arjan Paja dhe Marsel Sotiri. Shumica e anëtarëve të Bandës së Durrësit janë liruar nga burgu.
/a.r
