- Presidenti i Republikës u kërkon organeve ligjzbatuese dhe institucioneve shtetërore që të lëshojnë mesazhe të palëkundura garancie dhe stabiliteti me qëllim sigurimin e qytetarëve se nuk ka vend për panik dhe se janë marrë masat e nevojshme parandaluese kundër terrorizmit. Këtë kërkesë kreu i shtetit e ka bërë gjatë mbledhjes së Këshillit të Sigurisë Kombëtare (KSK) lidhur me situatën e krijuar në rang global, evropian dhe në veçanti rajonal si pasojë e sulmeve terroriste të kohëve të fundit në Paris, në Mali, etj. Ai ka vlerësuar marrjen plotësisht të masave operacionale dhe vënien në punë të mekanizmave të reagimit e të përballjes me rrezikun e sulmeve të mundshme. Kreu i Shtetit dhe njëkohësisht Komandanti i Përgjithshëm i Forcave të Armatosura pasi vuri në dukje dimensionin politik dhe ideologjik të kësaj lufte të re, theksoi se në këtë situatë kërcënuese, edhe Shqipëria si anëtare e NATO-s, vend kandidat për në Bashkimin Evropian dhe aleat i koalicionit ndërkombëtar kundër terrorizmit ka detyrimet dhe përgjegjësitë e veta përkatëse. Presidenti Nishani vlerësoi masat e marra nga qeveria si dhe angazhimet shumë serioze të agjencive ligjzbatuese në vend për të bashkërenduar veprimet konkrete edhe me partnerët në luftën kundër terrorizmit ndërkombëtar. Kreu i Shtetit vuri në dukje se në vijim të konkluzioneve të Këshillit Evropian për luftën kundër terrorizmit, Shqipëria është plotësisht e angazhuar për kontrollin e kufijve në rast të ndryshimit të fluksit të korridorit të emigrantëve dhe për parandalimin e trafikimit të armëve, edhe në kuadër të platformave rajonalë për këtë qëllim.
Zbardhen mesazhet e Nishanit në mbledhjen e Sigurisë Kombëtare
