Kryetari i lëvizjes Vetëvendosje, Visar Ymeri, ka takuar sot përfaqësuesen e lartë të BE-së, Frederica Mogherinin, me të cilën ka biseduar për rreziqet e Asociacionit të komunave serbe.
Në një postim në rrjetin social Ymeri ka thënë t’i ketë treguar Mogherinit për shpërputhjen flagrante që parimet themeltare të “Zajednicës” kanë me vlerat fundamentale të BE-së.
“Në pritjen e organizuar nga zyra e BE-së në Prishtinë për nderë të vizitës së Përfaqësueses së lartë të BE-së znj. Frederica Mogherini. Me znj. Mogherini diskutuam për zhvillimet politike në Kosovë dhe rajon”, ka shkruar Ymeri në Facebook.
“Ishte e rëndësishme t’ia shpreh drejtpërdrejt znj. Mogherini dëmet dhe rreziqet me të cilat ‘Zajednica’ e kanos sovranitetin e Republikës sonë, si dhe shpërputhjen flagrante që parimet themeltare të ‘Zajednicës’ kanë me vlerat fundamentale te BE-së”, ka shtuar ai. (b.an)