Lojtari i West Ham Declan Rice ka vendosur të luajë te përfaqësuesja angleze, në vend të Republikës së Irlandës.
Mesfushori 20-vjeçar tha se ka telefonuar si trajnerin e irlandës Mick McCarthy dhe homologun e tij tek Anglia Gareth Southgate për t’i informuar për vendimin e tij si dhe ka bërë një kërkesë formale drejt FIFA-s për të transferuar regjistrimin ndërkombëtar.
Rice ka luajtur tre ndeshje me Irlandën, por meqenëse sfidat ndaj Turqisë, Francës dhe Shteteve të Bashkuara kanë qenë miqësore, lojtari i lindur në Londër kishte mundësinë të bënte ndryshimin.
Sipas rregullave të FIFA-s, një lojtar nuk mund ta ndërrojë përfaqësuesen nëse luan në një ndeshje kompetitive.
Rice, i cili ka prejardhje irlandeze, ka përfaqësuar U16, U17, U19 dhe U21 të Irlandës përpara se të debutonte me ekipin e parë në marsin e 2018.
Në një deklaratë, Rice shprehet: “Ka qenë një vendim tepër i vështirë, një vendim që nuk prisja ta bëja në këtë moment të karrierës time.
“Shumë gjëra kanë ndodhur gjatë viteve të fundit dhe situatën e kam diskutuar me njerëzit e mi më të afërt. Shpresoj që njerëzit ta kuptojnë vendimin tim.”
/a.r
