Presidenti kinez Xi Jinping ka theksuar konsolidimin e ndjenjës së bashkësisë për kombin kinez midis 56 kombësive të vendit në një konferencë të nivelit të lartë mbi çështjet e kombësive.
Konferenca qendrore mbi çështjet e kombësive, e mbajtur në Pekin të premten dhe të shtunën, ishte konferenca e pestë e këtij lloji që nga Reforma dhe Hapja e Kinës, pas atyre në vitet 1992, 1999, 2005 dhe 2014.
Duke përmbledhur përvojën e kaluar, Xi tha se duhet të bëhen përpjekje për të forcuar unitetin mes kombësive dhe për të promovuar begatinë e përbashkët midis të gjitha kombësive. Ai nënvizoi gjithashtu rëndësinë e mbrojtjes së sovranitetit, sigurisë dhe interesave të zhvillimit të Kinës, duke bërë thirrje për përpjekje për të forcuar patriotizmin në gjirin e të gjitha kombësive.
Konsolidimi i ndjenjës së bashkësisë për kombin kinez është i nevojshëm për mbrojtjen e interesave themelore të të gjitha kombësive, realizimin e rilindjes kombëtare mes kombësive të karakterizuara nga barazia, uniteti, ndihma e ndërsjellë dhe harmonia, tha kreu i shtetit i Kinës.
Xi bëri thire për risi dhe zhvillim në punën e çështjeve të kombësive, për të mbrojtur më mirë të drejtat dhe interesat e ligjshme të të gjitha kombësive. Një parim i rëndësishëm është shtimi i gjërave të përbashkëta, duke respektuar dhe toleruar dallimet, tha ai.
Të gjitha kombësitë duhet t’u japin përparësi interesave të kombit kinez dhe ndjenja e secilës kombësi duhet t’i nënshtrohet dhe t’i shërbejë ndjenjës së bashkësisë për kombin kinez, theksoi ai. Ndërkohë, interesat e veçanta të secilës kombësi duhet të trajtohen mirë në procesin e realizimit të interesave të kombit kinez në tërësi, shtoi ai.
Duhet të nxiten shkëmbimet dhe integrimi midis kombësive dhe të merren masa për të krijuar një mjedis ku banorët e kombësive të ndryshme të përfshihen nga ana e hapësirës, ekonomike, shoqërore dhe psikologjike, tha ai.
Xi theksoi rëndësinë e parandalimit të rreziqeve të mëdha që lidhen me çështjet e kombësive. Çështjet ideologjike që përfshijnë elemente të kombësive duhet të trajtohen në mënyrë aktive dhe të duhur, ndërsa nevojiten përpjekje të vazhdueshme për të çrrënjosur idetë separatiste dhe ekstremiste. Ai gjithashtu bëri thirrje për forcimin e bashkëpunimit ndërkombëtar në luftën kundër terrorizmit.
