Përmes një ceremonie organizuar nga Bashkia e Kamzës, është nderuar këtë të martë Ibrahim Basha, efektivi që humbi jetën në aksionin e dytë në Lazarat këtë vit.
Kreu i Bashkisë, Xhelal Mziu, e ka cilësuar vitin 2015 si një vit të suksesshëm, pasi sipas tij, edhe ai, u riciklua në zgjedhjet lokale të 21 qershorit. Mziu ka shtuar gjithashtu se Kamza është dhe qyteti i pestë më i madh në Shqipëri, me shtimin në të, të zonës së Paskuqanit.
“2015 ka qenë një vit ndryshe, Kamza është bërë një bashki e madhe pasi është shtuar edhe Paskuqani. Ne jemi sot qyteti i pestë në Shqipëri, jemi qytet me 150 mijë banorë, jemi qytet me moshë shumë të re, jo vetëm në Shqipëri, por ndoshta edhe në Europë…ky qytet ka nevojë për kontributin e të gjithëve, ka nevojë për të gjitha faktorët që janë këtu sot, ka nevojë për të gjitha ato energji pozitive pa të cilat Kamza nuk do të ishte ajo që është sot. Viti 2015 ka qenë një vit i suksesshem për Kamzën, edhe për mua personalisht pasi u riciklova në 21 Qershor”- tha Mziu.
