Kryeministri Edi Rama është pyetur nga gazetarja Mirela Milori, nëse video-përgjimi për ministrin Xhafaj, është nga klane brenda PS-së.
Ai tha se në fund të kësaj historie, njerëzit do shohin gjëra tronditëse.
“S’e mendoj, se unë e kam pak a shumë të qartë si është zhvilluar, dhe nëse Prokuroria do i shkojë deri në fund, njerëzit do shohin gjëra që janë shumë tronditëse.
Këtu janë përfshirë struktura.
Këtu është një gjë matematikisht e sigurtë.
Mjafton që Prokuroria t’i drejtohet kujtdo agjencie e të marrë të vërtetën, unë e përsëris, askush mos më besojë, të presim rezultatin që të vijë nga një agjenci e specializuar ndërkombëtare cilado qoftë ajo”, tha Rama.
Ramës iu bë e njëjta pyetje nga Mirela Milori, si ajo e gazetares së re Ambrioza Meta, dhe u përgjigj si më poshtë:
“Më vjen shumë keq që u bë ngjarje, më vjen të qesh e të qaj me ata që e trajtuan si një moment heroizmi gazetaresk.
Ishte shfaqje brutale e mungesës së etikës.
Një familje, një parti politike, një qeveri, një organizatë s’mban përgjegjësi për faktin se një anëtar i familjes mund të bëjë një mëkat, që një anëtar i familjes mund të shkelë ligjin, të dali si dru i shtrembër, por përgjegjësi për mënyrën si reagon ndaj rastit.
Një qeveri është shumësi njerëzish që i bashkojnë disa vlera, parime, program e motivim, por të gjithë janë të ndryshem e cdonjeri mund të jetë i tunduar dhe ndër ta ka njerëz që bien në ngasje e pastaj shfaqen në shkelje të ligjit apo të akuzuar.
Edhe në kishë njerëzit shkojnë si vdektarë dhe mëkatarë, jo si engjëj, që në rast se dikush ka rënë në mëkat, është i përjashtuar nga vatha e perëndisë.
Nisur nga kush i ben akuzat, atëherë s’gjejmë më askënd që mund të jetë i pagjykueshëm në moralin e vet.
Unë jam eksperiment i gjallë i akuzave që janë bërë, unë s’duhet të isha më në faqe të dheut.
Ka akuza të drejtësisë, poltikës, insinuata, në raport me këto ka gjykime dhe gjykimi bazohet mbi domosdoshmërinë që figura që akuzohet të mos jetë i lidhur mbi akuzat që i bëhen dhe e dyta se në Shqipëri ka një baltë të madhe dhe kulturë akuzazh që vjen nga koha e vjetër.
Në rastin e Saimir Tahirit reagova pasi akuza erdhi nga drejtësia dhe tani të provojë të vërtetën” tha Rama./a.m.
