Absurde, kështu e ka cilësuar kërkesën e liderit të opozitës Lulzim Basha, kreu i komisionit të reformës në drejtësi Fatmir Xhafaj, i cili nuk sheh asnjë lloj logjike të shëndoshë në rinegocimin e ligjit të Vettingut, një “propozim” ky i hedhur nga kryedemokrati. Xhafaj shprehet se një kërkesë e tillë, e ardhur nga ajo forcë politike që e çoi në kushtetuese këtë ligj, është thjesht një absurditet i padëgjuar më parë në historinë parlamentare.
“Kjo ishte gjëja më absurde që kisha dëgjuar ndonjëherë, që partitë paskan fuqi të zhbëjnë Gjykatën Kushtetuese. PD nuk mori pjesë në debatin për Vettingun, nuk u angazhua fort, nuk arrij ta kuptoj. Përfundimisht e bëri kauzë në Kushtetuese për të bllokuar procesin dhe sot kërkon që të mblidhen dy partitë që t’i thonë Gjykatës se biem dakord. Çështja është në Gjykatë, pavarësisht se nuk jam i bindur me vendimin e Kushtetueses për ta pezulluar, gjithsesi respektoj institucionin dhe po presim me qetësi opinionin e Komisionit të Venecias, i cili javën e ardhshme do të jetë publik. Shpresoj që Gjykata ka qenë serioze në pyetjet e dërguara në Kushtetuese dhe po ashtu të respektojë opinionin e Venecias. Prova e fortë e Kushtetueses do të jetë në respektimin e opinionit të Venecias. Do të respektojmë me qetësi vendimet e Kushtetueses”- tha Xhafaj.
Ditën e djeshme, Rama akuzoi PD-në se po bllokon hapjen e negociatave me çdo kusht, një deklaratë që solli reagimin e Bashës, i cili i propozoi Ramës që të rinegociojnë disa ndryshime të reja në ligjin e vettingut, ligj i cili shkoi në Gjykatën Kushtetuese me kërkesë të vetë demokratëve dhe që aktualisht ndodhet nën sitën e Komisionit të Venecias.
Gjithashtu Xhafaj deklaroi sot se në muajin dhjetor komisioni do të fokusohet te ligjet e tjera të Reformës në Drejtësi.
“Në dhjetor më shumë vëmendje ligjeve, por jo atyre që janë miratuar, por ligjeve të tjera të Reformës në Drejtësi. Pjesën më të madhe të dhjetorit do të diskutojmë për Reformën në Drejtësi. Këto ditë do të nisim 20 ligje të reja për Reformën në Drejtësi. Nuk e di nëse do të jetë opozita e pranishme, janë të paparashikueshëm.
Këto janë ligje që do e bëjnë sistemin funksional, do të bëjmë konsultime edhe me gjyqtarë dhe prokurorë” deklaroi ai në Komisionin e Ligjeve.
