“Lulzim Basha nuk ka bërë asgjë për Tiranën. Nuk ka mbajtur asnjë nga premtimet e bëra me aq bujë në 2011. As premtimet për projekte madhore që sipas tij do të transformonin qytetin e as premtimet për të bërë ato që janë detyrat bazë të çdo bashkie.”
Kështë është shprehur deputetja e PS Olta Xhaçka, në një deklaratë për mediat nga selia rozë.
Duke folur mbi deklaratat e Bashës të bëra mbrëmë në një emision televiziv ku u shpreh se kopshtet dhe çerdhet janë konform standarteve, Xhaçka tha se Basha gënjen dhe se nuk bëri asgjë.
“Premtoi se do të zgjidhte problemin e infrastrukturës së kopshteve e çerdheve. Premtoi se do të ndërtonte kopshte të reja për të zgjidhur problemin e mbipopullimit. Premtoi se do t’i rikonstruktonte e do t’i kthente në mrekullinë e 8 të botës kopshtet ekzistuese.
Natyrisht, nuk bëri asgjë. Këtë e dinë fare mirë qytetarët që duhet t’i çojnë fëmijët e tyre në kopshte të tejmbushura, nëse janë aq me fat sa të arrijnë t’i regjistrojnë në një kopsht publik. Por meqë Luli ngul këmbë që përveç tramvajit, bulevardit të ri dhe kartës së studentit e ka mbajtur edhe premtimin për kopshtet le të shohim konkretisht me fakte se çfarë ka bërë.
Në vitin 2013 projekti i Lulit për rikonstruksion dhe ndërtime kopshtesh parashikonte 4.2 milionë dollarë investime. Në fund të vitit 2013 arriti të realizonte vetëm 210 mijë dollarë investime nga ky plan i bërë nga vetë Luli. Sado i paaftë të jesh në matematikë është e vështirë të të shpëtojë fakti se me këto ritme Lulit do t’i duheshin fiks 20 vjet për realizuar planin.
Praktikisht, Luli po u thotë prindërve që i kanë sot fëmijët në kopshte dhe çerdhe që kur nipërit e tyre të bëhen për të shkuar në kopsht, një pjesë e kopshteve të Tiranës do të jenë në gjendje më të mirë. Kjo është ajo çka nënkupton Luli kur përsërit pareshtur se është vizionar dhe largpamës. Sepse Luli sheh realisht shumë larg.
Qytetarët e Tiranës nuk kanë kohë për të humbur me vizionet e Lulit apo kandidatëve të Lulit. Sot i madh e i vogël e di që problemi më i madh i Tiranës ka qenë Luli. Prandaj në 21 qershor ata do të votojnë për ta rikthyer kryeqytetin në drejtimin e duhur.”, tha Xhaçka
