Donald Trump, ka mbrojtur të dërguarin e tij special Steve Witkoff pasi një regjistrim në audio i doli atij në media, ku këshillonte një zyrtar rus se si ti afrohej presidentit amerikan.
Trump u tha gazetarëve këtë të mërkurë se nuk e kishte dëgjuar audion, megjithatë besonte se Witkoff po bënte “atë që bën një negociator” për t’i “shitur” planin e paqes si Rusisë ashtu edhe Ukrainës.
Telefonata e rrjedhur nga muaji i kaluar doli në dritë disa ditë pasi një draft me 28 pika i planit të paqes, i paraqitur nga SHBA-të, pasqyronte pozicionet ruse mbi luftën e saj të plotë në Ukrainë.
Witkoff e ka vizituar Moskën disa herë këtë vit dhe javën e ardhshme do të takohet sërish me Presidentin rus Vladimir Putin. Por ai ende nuk ka zhvilluar bisedime në Kiev.
I dërguari special sicc shkruan BBC nuk ka shkuar kurrë në Kiev, megjithëse zyrtarë të tjerë amerikanë e kanë vizituar kryeqytetin ukrainas, madje sekretari i ushtrisë Dan Driscoll ishte në Kiev këtë javë. Trump tha se do të ketë bisedime të tjera me ukrainasit.
Bisedimet diplomatike kanë vazhduar pas kritikave nga liderët ukrainas dhe evropianë se drafti fillestar ishte tepër i favorshëm për Rusinë. Ndër propozimet ishte dorëzimi i territorit të kontrolluar nga Ukraina në lindje tek Rusia.
Plani është rishikuar më pas për të pasqyruar më mirë interesat e Ukrainës dhe pikëpamjet e aleatëve evropianë. Presidenti ukrainas Volodymyr Zelensky ka thënë se është i gatshëm të takohet me Trump-in për të diskutuar “pikat e ndjeshme” që mbeten.
Në regjistrimin audio të rrjedhur në media, të siguruar dhe shpërndarë si transkript nga Bloomberg, Witkoff dëgjohet duke këshilluar Yuri Ushakov-in, këshilltarin e politikës së jashtme të Putin-it, se si të fitonte simpatinë e presidentit amerikan.
Gjatë bisedës së rrjedhur, dy burrat flasin për përfundimin e luftës, me Ushakov-in që pyet nëse do të ishte e dobishme që shefat e tyre të flisnin.
Witkoff citohet të ketë thënë se po, dhe se “njeriu im është gati ta bëjë”. Më pas e këshillon se si ta zhvillojnë telefonatën.
“Thjesht përsëritni që e uroni presidentin Trump për këtë arritje… që e respektoni si një njeri paqeje dhe jeni vërtet të lumtur që e patë këtë gjë të ndodhte,” citohet të ketë thënë Witkoff. “Mendoj se nga kjo do të dalë një telefonatë shumë e mirë.”
Sipas transkriptit, Witkoff shton: “I thashë presidentit që Federata Ruse gjithmonë ka dashur një marrëveshje paqeje. Ky është besimi im. Problemi është se kemi dy kombe që e kanë të vështirë të arrijnë kompromis.’”
“Madje po mendoj që ndoshta të hartojmë një propozim paqeje me 20 pika, ashtu si bëmë në Gaza,” shton Witkoff.
