Nga Martin Leka*
Kur NATO kishte hyrë në javën e dytë të bombardimeve në Serbi dhe gjithë bota shikonte me ankth spastrimin etnik më të pashembullt të shqiptarëve nga trojet e tyre në Kosovë, dilemat mbi fatin e shqiptarëve shtoheshin. Rreth gjysëm milioni kosovarë ishin përzënë me dhunë nga makineria ushtarake serbe dhe ishin pritur nga vëllezërit shqiptarë të Shqipërisë. Shumica përmes kufirit me Kukësin. Mijëra të tjerë kishin kaluar përmes pikave kufitare të Maqedonisë së Veriut dhe Malit të Zi. Eksodi biblik kishte tmerruar botën.
Ndërkohë, regjimi i Milosheviçit ende nuk jepte asnjë sinjal kapitullimi, megjithë furinë e raketave që hidheshin në infrastrukturat kyçe ushtarake.
Radio-Tirana ishte vënë e gjitha në funksion të luftës. Programacioni i saj ishte fshirë. Telefonat e studiove dhe drejtuesve ishin në dispozicion për të reja nga lufta që po zhvillohej në Kosovë. Nga njëra anë ishte NATO me operacionin ushtarak, nga ana tjetër ishin luftëtarët e UÇK. Radio-Tirana dëgjohej në Kosovë përmes transmetimit në AM, në valët 468 m me transmetues 50 KW; Radio-Kukësi gjithashtu në AM 303 m.
Nisur nga këto të dhëna, nisa një shkresë në Ambasadën Amerikane, në të cilin kërkoja një intervistë me Gjeneralin Wesley Clark, Komandandin Suprem të NATO-s, ai që komandonte operacionin ushtarak kundër regjimit të Milosheviçit. Përgjigja ishte brenda ditës me anë të një telefonate, dhe pak a shumë, ishte kjo: Gjenerali Clark për shkak të detyrës dhe specifikave të luftës, nuk jep intervista as për agjensitë më të mëdha si Reuters, BBC, AP, etj. Në përfundim të telefonatës, instikti i gazetarit ose pakënaqësia ime për refuzimin, më bëri ti them zyrtarit të ambasadës një fjali: -Reuters, BBC e AP nuk besoj se i dëgjojnë në Kosovë as ata pak që kanë mbetur atje pa u përzënë, as luftëtarët e UÇK, ndërsa Radio Tiranën e vogël, po!
Ndërkohë që vazhdoja punën në rutinën e përditëshme që kishte kryefjalë vetëm luftën dhe nga telefonat e tyre satelitorë kam pritur me dhjetëra telefonata komandantë e ushtarë të UÇK nga zona e Dukagjinit, Drenicës, Deçanit, Krushës së Madhe, Gjakovë, Pejë, etj., të nesërmen në mëngjes, nga atasheu ushtarak i Ambasadës Amerikane mu kërkuan sqarime se si mund të dëgjohej Radio-Tirana në rajonet e Kosovës. Kryeinxhinieri i ndjerë Spiro Konduri më dha një hartë në të cilën ishin të dhënat teknike për dëgjueshmërinë në të gjithë Kosovën. Këtë hartë e dërgova menjëherë në ambasadë, që është jo më shumë se 100 metra vijë ajrore nga ndërtesa e Radios.
Ishte Mbrëmje vonë, po atë ditë, kur më lajmëruan nga Ambasada Amerikane: “Nesër në orën 17.05, ju mund të intervistoni Gjeneralin Clark, Komandantin Suprem të NATO”. Më sqaruan gjithashtu se duhen jo më shumë se 5 pyetje, si dhe disa të dhëna të tjera që nuk kanë interes për publikun dhe që kanë të bëjnë me profesionalizmin dhe etikën gazetareske. Mund të them vetëm kaq: Gjenerali ishte i lumtur që kishte mundësi ta dëgjonin në Kosovë qytetarët dhe luftëtarët dhe që për ta kishte rëndësi ky mesazh: NATO do ta fitojë luftën me Milosheviçin…
…Sot Gjenerali po jep mesazh botës nga Haga për drejtësinë e luftës dhe luftëtarëve për liri.
Më poshtë intervista e Wesley Clark dhënë drejtorit të Radio-Tiranës, Prill, 1999.
Pyetje: Zoti Klark, a mendoni se NATO do ta fitojë luftën me Milosheviçin vetëm me bombardime nga ajri?
Wesley Clark– Unë e di me saktësi se çfarë parashikon presidenti Milosheviç. Por unë mund tu them me siguri se NATO do ta fitojë luftën.
Pyetje: Nëse regjimi i Beogradit nuk do ti pranojë kushtet e vëna nga Aleanca, si mendoni ju: për sa kohë do të vazhdojnë bombardimet e NATO-s?
Wesley Clark – Udhëheqësit politikë kanë thënë se bombardimet e NATO-s do të vazhdojnë aq kohë sa duhet. Dhe kjo bëhet për arësye që Beogradi duhet të kuptojë se nuk mund të injorojë kushtet e vëna nga NATO.
Pyetje: Hitleri dhe diktatura të tjera janë mundur vetëm me luftë tokësore. Si do të bëhet me Milosheviçin?
Wesley Clark – Ne do të vazhdojmë me sulme ajrore dhe pikërisht këtë gjë po bëjmë edhe tani. Këto sulme të NATO-s janë të kontrolluara nga udhëheqësit politikë.
Pyetje- Si e vlerësoni ju qëndrimin zyrtar të Shqipërisë ndaj NATO-s dhe popullsisë së Kosovës të dëbuar prej andej me dhunë?
Wesley Clark – Ne e vlerësojmë lart qëndrimin e Shqipërisë dhe do të bëjmë ç’është e mundur për ta mbështetur Shqipërinë. Ne do të ndihmojmë njerëzit e dëbuar me dhunë nga Kosova. Do të ndihmojmë me ndihmën humanitare dhe do të ndihmojmë që ata të kthehen përsëri në Kosovë.
Pyetje: Zoti Klark, ç’mund të shpresojnë shqiptarët nga kjo luftë që po zhvillon NATO?
Wesley Clark – Shqiptarët do të fitojnë atë që do të fitojë e gjithë Europa. Ne do të hyjmë në shekullin e njëzetenjëtë duke i eleminuar këto regjime, duke vendosur më shumë të drejta njerëzore dhe duke i dhënë fund mbi të gjitha nacionalizmit të dhunshëm i cili është shkak i luftërave.
Pyetje: Cili është mesazhi juaj për shqiptarët që po ju dëgjojnë në këto momente përmes valëve të Radios Kombëtare?
Wesley Clark – Në këtë Europë ne duhet të jemi të bashkuar në një familje të madhe e cila të punojë së bashku për të garantuar të drejtat e parashikuara në të gjitha kartat ndërkombëtare nëpërmjet Këshillitt ë Europës dhe Marrëveshjes së Helsinkit. Dhe NATO do të bëjë çdo gjë të mundur për të siguruar paqen. Por gjithashtu varet edhe nga grupet e tjera ti fitojnë këto vlera.
Pyetje: A dëshironi të shtoni gjë tjetër për dëgjuesit tanë?
Wesley Clark – Ju falënderoj për këtë mundësi që më dhatë t’i flas popullit shqiptar. Faleminderit!
*Ish-Drejtor i Radio-Tiranës, 1997-2002
