Rreth 10 000 persona pritet të bashkohen sot me një protestë të krahut të majtë në Hamburg që përkon me ardhjen e presidentit të SHBA-së, Donald Trump në Gjermanisë në takimin e G20-ës që do të zhvillohet këtë fundjavë.
Policia gjermane paralajmëroi se 8 000 të pranishmit në protestën e quajtur “Welcome to Hell” (Mirëseerdhët në Ferr) ishin të gatshëm të përdornin dhunën, ndërsa zyrtari më i lartë i Sigurisë në Hamburg tha se 1 000 prej tyre ishin ekstremistë të majtë nga vendet si Italia dhe ato skandinave.
Organizatori i protestës, Andreas Blechschmidt tha se “autoritetet gjermane dhe Shërbimi i Brendshëm i Inteligjencës kanë kryer një fushatë masive në prag të ngjarjes së sotshme për të diskredituar pjesëmarrësit dhe për të penguar personat që të bashkohen me të”.
Qindra protestues mbërritën sot në mëngjes në stacionin qendror të trenit, në Hamburg të cilët një natë më parë kishin qënë në qytetin zviceran të Bazelit.
Për shkak të nënshtrimit të kontrolleve të hollësishme në stacionin e trenit, pasagjerët u larguan katër orë më vonë se sa ishte planifikuar fillimisht.
“Rreth 210 persona i janë nënshtruar kontrolleve”, njoftoi policia gjermane.
“Midis tyre u gjetën maska të gazit, maska fytyre dhe syze mbrojtëse”, shtoi policia.
“Të paktën 33 personave iu është mohuar hyrja në Gjermani”, raportojnë autoritetet.
Liderët gjermanë, duke përfshirë kancelaren, Angela Merkel dhe ministrin e Drejtësisë, Heiko Maas – kanë mbështetur të drejtën për protestë paqësore në lidhje me samitin e G20-ës.
Gjithashtu, Gjykata më e lartë e vendit mbështeti protestuesit në kërkesën tyre për një kamp proteste në periferi të samitit të G20-ës.
Por policia e Hamburgut ka vendosur rregulla të rrepta, për shembull duke i thënë protestuesve se nuk do të lejohen të kalojnë natën në kamp.
Shefi i policisë së Hamburgut, Ralf Martin Meyer, tha sot se dyshonte se protestuesit e G20-ës mund të jenë përfshire në një incidenti zjarri gjatë natës ku u shkatërruan pothuajse tetë makina, në periferi të Eidelstedt.
Protesta kryesore e G20-ës do të zhvillohet të shtunën në mëngjes dhe pritet të bashkohen rreth 100 000 protestues nga një rrjet i shoqërisë civile, i grupeve ambientaliste dhe politike./b.d
