Një video e lajmeve ruse që pretendon të tregojë “vullnetarë” serbë që stërviten për të luftuar përkrah trupave ruse në Ukrainë, ka nxitur zemërim në Serbi, duke ekspozuar marrëdhëniet e saj komplekse me Moskën, raporton BBC.
Grupi mercenar i Rusisë Wagner bëri videot në gjuhën serbe për të inkurajuar rekrutimin për luftë. Në lidhje me këtë ka reaguar me zemërim presidenti i Serbisë, Aleksandar Vuçiç në televizionin kombëtar.
“Pse ju, nga Wagner, telefononi dikë nga Serbia kur e dini se kjo është kundër rregulloreve tona? tha ai.
Kritikët shpesh e akuzojnë Serbinë se i jep përparësi miqësisë së saj të gjatë me Rusinë mbi ambicien e saj për t’u bashkuar me BE. Por presidenti Vuçiç tha se Serbia jo vetëm që ishte “neutrale” në lidhje me luftën në Ukrainë, por se ai nuk kishte folur me presidentin rus Vladimir Putin për “shumë muaj”.
Është e paligjshme që serbët të marrin pjesë në konflikte jashtë vendit. BBC thotë se numri i rekrutëve serbë të përfshirë nuk duket të jetë i rëndësishëm. Disa luftuan përkrah forcave ruse në Ukrainë në vitin 2014, por jo me miratim zyrtar.
Gjykatat serbe dënuan dhjetëra persona për pjesëmarrje në “luftimet në frontet e huaja të betejës”.
Të enjten, një avokat me bazë në Beograd dhe grupe kundër luftës ngritën ankesa penale kundër ambasadorit rus si dhe kreut të agjencisë së informacionit dhe sigurimit shtetëror të Serbisë (BIA) për rekrutimin e dyshuar të serbëve për grupin Wagner.
Në Beograd, ku muralet provokuese janë jashtëzakonisht të zakonshme, emblema e kokës së vdekjes së Wagnerit u shfaq në një mur në qendër të qytetit javën e kaluar nga Patrullat Popullore, një organizatë e krahut të djathtë ekstrem, e cila më parë ka organizuar mitingje pro-ruse.
Serbia ka votuar pro rezolutës në Kombet e Bashkuara që dënojnë agresionin e Rusisë.
Presidenti Vuçiç këtë javë e bëri të qartë qëndrimin e Beogradit: “Për ne, Krimea është Ukrainë, Donbasi është Ukrainë dhe kështu do të mbetet”, tha ai.
/a.r
