Kryeministri i Serbisë, Aleksandar Vuçiç, priti sot në një takim sopranon shqiptare me famë botërore Inva Mula, e cila do të interpretojë të mërkurën në 25 maj, për herë të parë në skenën e Teatrit të Beogradit, rolin e Mimit në operën “La Boheme”.
Lajmi bëhet i ditur nga agjencia serbe e lajmeve “Tanjug”, e cila ka publikuar edhe disa foto nga takimi i kryeministrit serb Vuçiç me sopranon shqiptare Inva Mula.
Inva Mula është e ftuar speciale në këtë shfaqje, që realizohet në kuadër të marrëveshjes së nënshkruar së fundmi mes Teatrit Kombëtar të Operas dhe Baletit në Tiranë dhe atij serb.
“Jam shumë e lumtur që shkoj në një teatër ku 71 vite më parë e madhja Tefta Tashko Koço ka kënduar “La boheme”. Kjo përbën histori. Unë këndoj për herë të parë në ketë teatër në periudhën postkomuniste”, është shprehur Inva Mula.
Në një intervistë për TVSH-në para se të nisej për Beograd, sopranoja Inva Mula theksonte se nuk mund t’i shpëtonte ky interpretim edhe kontekstit historik, kjo pjesëmarrje e saj në operan “La Boheme” synon të ndërtoje ura mes shqiptarëve dhe serbëve jo vetëm në muzikë.
Performanca e Inva Mulës do të dirigjohet nga dirigjenti Dejan Cabic dhe do të shoqërohet nga kori dhe orkestra e Operës së Beogradit. (javanews.al / r.a)
