Presidenti serb Aleksandër Vuçiç dhe kryeministri i Maqedonisë së Veriut, Zoran Zaev, mbërrijnë në Tiranë në kuadër të Samitit të tretë të Shengenit Ballkanik i cili do të jetë dy ditë, në kryeqytet dhe Durrës.
Pas Novisadit në Serbi dhe Ohrit në Maqedoni, tashmë i takon Shqipërisë dhe Ramës të jenë pritës të takimit për Samitin trepalësh mes tre vendeve ballkanike.
Ndërkohë Kosova refuzoi ftesën. Ramush Haradinajt nuk i shkoi asnjë ftesë ndërkohë Presidenti Hashim Thaçi e refuzoi atë.
Sipas mediave informative, Vuçiç, Zaev dhe Rama do të takohen sot tek hotel ‘Rogner’ në një takim informal, dhe më pas do të marrin pjesë në eventin e bamirësisë ‘Ti nuk do të jesh kurrë vetëm’, për mbledhjen e fondeve për të prekurit nga tërmeti.
Nesër ata do të inspektojnë zonat e prekura nga tërmeti në Durrës, dhe më pas do të zhvillohet Samiti i tretë në Durrës, i cili fillon në orën 10:00 të paradites.
Në orën 12:00 të ditës së nesërme do të ketë takim mes delegacioneve, ndërsa pjesë e Samitit do të jetë dhe Presidenti i Malit të Zi Gjukanoviç, i cili vjen nesër. /e.s/
