Ekstradohet nga Milano, Itali drejt vendit tonë shtetasi shqiptar Martin Maroci, alias Marku, alias Çupi, 43 vjeç, lindur në Klos. Gjykata e Lezhës, me datë 17 tetor 2014, ka caktuar masën e sigurisë “Arrest me burg“ për kryerjen e veprës penale të “Vrasje me paramendim “ dhe “Mbajtjes pa leje te armëve luftarake”.
Sipas burimeve zyrtare, 43-vjeçari në datën 24 nëntor 1997 në Kalithea të Greqisë, në bashkëpunim me shtetasin P.C., kanë vrarë shtetasin N.A. Në bazë të informacioneve të siguruara në rrugë operative nga Sektori i Krimeve të Rënda në Drejtorinë Vendore të Policisë Lezhë , në bashkëpunim me Interpol Tirana dhe Interpol Romën, u bë i mundur lokalizimi dhe arrestimi i tij në Itali me qëllim ekstradimi drejt vendit tonë.