Vrau fqinjin dy ditë më parë, 38-vjeçari vetëdorëzohet në Shkodër

Është vetëdorëruar në policinë e Shkodrës, autori i dyshuar i vrasjes së Martin Ndrecës. 38-vjeçari Ndue Zefi vrau dy ditë më parë fqinjin e tij, në zonën e ish-kënetës në Durrës.

45-vjeçar u gjet i pajetë në një automjet tip “Benz”. Vrasja ndodhi rreth orës 01:10 duke gdhirë e diela. Ngjarja dyshohet se ka ndodhur për motive të dobëta. Sipas të dhënave policore, bëhet me dije se viktima dhe autori njiheshin me njëri-tjetrin, madje para vrasjes kishin qenë të ulur bashkë në lokalin e lagjes. Pikërisht aty, teksa pinin ka nisur një konflikt mes tyre. Mësohet se ata nuk janë konfliktuar fizikisht, por kur janë ngritur, autori Ndue Zefi, ka shkuar në banesën e tij dhe ka marrë kallashnikovin për të “larë hesapet”.

Ai i ka zënë pritë fqinjit të tij, Martin Ndreca, 45 vjeç dhe e ka qëlluar. Mbi trupin e viktimës janë derdhur pesë plumba, zhurma e të cilave ka zgjuar të gjithë lagjen. Kanë qenë banorët e zonës, ata që e kanë gjetur të pajetë 45-vjeçarin si dhe kanë lajmëruar më pas policinë. Pas hetimeve, blutë e Durrësit kanë mundur të identifikojnë dhe shpallin në kërkim autorin e dyshuar të ngjarjes.

Për momentin mbeten ende të paqarta motivet që e shtynë 38-vjeçarin të ekzekutonte me 5 plumba fqinjin e tij.

DËSHMITARËT

“Martin Ndrecën e njihja dhe kishim bashkë origjinë të njëjtë nga Mirdita. Kur në lagje plasën krismat, të gjithë dolëm të alarmuar nga shtëpitë dhe lajmëruam direkt policinë. Shumë e rëndë është të vrasësh një njeri për një fjalë goje, por edhe sikur të ketë bërë më shumë, vdekjen s’e meriton kush”, – thotë një prej banorëve në zonën e ish-Kënetës, pas vrasjes së 45-vjeçarit.

E.Xh./