Gjykata Themelore në Pejë ka dënuar me burgim të përjetshëm Edmond Lajqin, të akuzuar për vrasjen e bashkëshortes së tij, Gj.U.
Në shqiptimin e dënimit, gjykatësi Musë Povataj tha se Lajqi ka kryer veprën “vrasje e rëndë”, ndërkaq për armëmbajtje pa leje, i akuzuari nuk është dënuar derisa të konfiskohet arma me të cilën është kryer krimi.
Vendimi është mirëpritur nga familja e të ndjerës. Vëllai i saj tha se ky dënim ua lehtësoi “sado pak dimbjen”.
Më 16 prill të këtij viti, Lajqi kishte vrarë bashkëshorten e tij me armë zjarri në banesën e tyre në Pejë. Pas aktit, ai ishte vetëdorëzuar në Polici të Kosovës.
Lajqi e pranoi fajësinë gjatë seancës gjyqësore më 24 dhjetor.
Aktakuza ndaj tij ishte ngritur në nëntor të këtij viti dhe në të thuhej se vrasja ishte kryer mëngjesin e 16 prillit.
Sipas aktakuzës, Lajqi kishte pasur probleme të vazhdueshme me bashkëshorten e tij, tashmë të ndjerën, Gj.U, dhe i njëjti thuhet se kishte ushtruar dhunë psikike ndaj saj.
Organizatat për të drejtat e njeriut dhe institucionet kanë ngritur shpesh shqetësimet për dhunën ndaj grave dhe në shtet organizohen edhe fushata për luftimin e dhunës ndaj grave.
Sipas të dhënave, në 14 vjetët e fundit në Kosovë janë vrarë 58 gra.
Organizatat për mbrojtjen e të drejtave të njeriut, në disa raste, kanë fajësuar autoritetet për dështim në mbrojtjen e grave të rrezikuara nga dhuna. Në të shumtën e rasteve, autorë të vrasjeve kanë qenë bashkëshortët, pastaj baballarët dhe djemtë.
