Nga 14 vrasje me pasojë vdekje që kanë ndodhur mesatarisht në qarkun e Durrësit çdo vit, numri i tyre është përgjysmuar gjatë 2015-s e 2016-s.
Në 6-mujorin e dytë të vitit 2016, për herë të parë në dy dekadat fundit, nuk ka ndodhur asnjë vrasje me pasojë vdekje. Të dhënat janë bërë të ditura në analizën vjetore të drejtorisë së policisë së qarkut të Durrësit, e cila ka në varësi tre komisariate, të Durrësit, Shijakut dhe Krujës. Perlat Çullaj, drejtori i policisë së Durrësit ka sjellë në vëmendje të opinionit publik, uljen e shkallës së kriminalitetit, duke bërë krahasimet prej vitit 2010, kur numri i vrasjeve me pasojë vdekjen varionte nga 14 deri në 17 në vit.
“Referuar krimeve të rënda nisur nga 2013-a kemi rënie të krimeve. Në 2016-n janë shënuar vetëm dy vjedhje me armë. Është rritur zbulueshmëria dhe janë ulur krimet. Kjo tregon se ka qëndrueshmëri e stabilitet”, pohoi Çullaj.
Ndërkaq, kreu i policisë së Durrësit, për 2017-n tha se pritet sërish një punë e madhe, kjo sepse ky vit përkon edhe me zgjedhjet parlamentare.
Çullaj theksin e vuri te puna parandaluese që kryhet nga ana e policisë në komunitet, për të parandaluar krimet, si dhe tek detyrat specifike që kanë punonjësit e policisë në përmbushjen e misionit të tyre. /java/b.d
Vrasjet e ndodhura gjatë 7 viteve të fundit:
Viti – Numri
2010 – 16
2011 – 16
2012 – 13
2013 – 16
2014 – 12
2015 – 5
2016 – 6
