Një ndër dosjet më të bujshme që ndodhet në prokurorinë e Sarandës, e cila flet për vrasjen dhe zhdukjen e Fatmir Sulovarit dhe Leonidha Theodhorit, është gati të transferohet në prokurorinë e posaçme SPAK.
“Ora News” mëson se prokurorët e dosjes ndodhen në fazën e përfundimit të vendimit, për shpalljen e moskopetencës lëndore dhe pritet që në fillim të muajit Nëntor 2023, të gjitha aktet hetimore për këtë çështje dhe ngjarjen e sulmit me tritol në shtëpinë e biznesmenit Lefter Lefteri alias Afëz Kulla, ti transferohen prokurorëve të SPAK.
Do jenë këta të fundit që më pas do kryejnë hetime të mëtejshme dhe të thelluara, për këto ngjarje të ndodhura në qytetin bregdetar.
Lënda shpërthyese ka dyshime të forta se po përgatitej t’i vendosej një personazhi të botës së krimit në Fier.
Rolin për këtë punë, policia beson se e kishte marë i njëjti grup kriminal që kreu rrëmbimin, vrasjen dhe më pas zhduku dy të rinjtë në fshatin Vrinë të Sarandës.
Për vrasjen dhe zhdukjen e dy miqve Sulovari dhe Leonidha Theodhorit, deri në këtë fazë të hetimit janë arrestuar Albi Mëcini, i cili ndodhet në burg.
Mëcini, u zbulua nga një gjurmë biologjike e fiksuar nga policia e Vlorës, në një bidon uji i sekuestruar në makinën tip “Benz”, me të cilën ishte marë peng njëri prej personave të zhdukur.
Mëcini, është një nga miqtë besnikë të Admir Tafilit, një i dënuar ky me tre burgime të përjetshme. Mëcini është personazhi kryesor që mori pjesë në arratisjen e bujshme të Tafilit nga burgu i sigurisë së Lartë në Drenovë të Korçës.
Ndërsa në gjendje arresti për zhdukjen e dy sarandjotëve, u vendos nga gjykata për një periudhë 4 mujore dhe një menaxher shitjesh i pasurive të paluajtshme në Sarandë, Sofokli Baxheri.
Baxheri, u arrestua për akuzën e “Veprimeve që pengojnë zbulimin e të vërtetës”, pasi ishte njeriu që i kishte gjetur shtëpinë me qëra anëtarëve të grupit kriminal, dhe nuk tregonte veprimet që kishte kryer atë ditë, duke penguar policinë të zbardhte ngjarjen.
Aktualisht Baxheri është ndarë nga kjo dosje dhe çështja kundër tij i përcillet gjykatës së Sarandës për shqyrtim gjyqësor.
Kurse në kërkim për këtë krim vijojnë të jenë dy miqtë e të arrestuarit Albi Mëcinit, Sebastian Lataj dhe Arafat Manërkolli, të cilët gjatë hetimeve të kryera rezultojnë të përfshirë në rrëmbimin dhe zhdukjen e Fatmir Sulovarit dhe Leonard Theodhorit në fshatin Vrinë të Sarandës.
Njëherësh në kërkim është dhe Ervis Cukali nga Tirana, i cili rezulton i përfshirë tek ngjarja e zbulimit të 22 kg dinamit dhe 3 bidonave me benzinë.
Rrëmbimi, vrasja dhe më pas zhdukja e trupave të Sulovarit dhe Theodhorit, ndodhi në muajin Prill 2023. Ka dyshime dhe indicie se trupat e Fatmir Sulovarit dhe Leonard Theodhorit, janë vrarë dhe më pas groposur në fshatin Vrinë të Sarandës.
Konflikti lidhet me përplasjet e një pas njëshme dhe serinë e vrasjeve që nisi për tregtinë e drogës në ishullin e Korfuzit dhe disa zona në Greqi, duke çuar në vrasjen e Aleksandër Sadikaj dhe Edmond Papës në Tiranë.
