Katër persona në Elbasan dhe një në Berat të dënuar për vrasje dhe drogë, duhet të provojnë origjinën e pasurisë së tyre, e cila dyshohet të jetë produkt i aktivitetit kriminal.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë:
-Elis Bahushi, banues në Elbasan, i dënuar për veprat penale “Prodhimi dhe shitja e narkotikëve” dhe “Pastrimi i produkteve të veprës penale”;
-Edmond Stafa, banues në Elbasan, i dënuar për veprën penale “Trafikimi i narkotikëve”;
-Met Bozi, banues në Elbasan, i dënuar për veprën penale “Vrasja në rrethana të tjera cilësuese”. Met Bozi ishte një nga personat kryesorë që kryen masakrën e Cërrikut në vitin 1997 mbi 6 gardistët.
-Bledi Çepa, banues në Elbasan, i dënuar për veprën penale “Prodhimi dhe shitja e narkotikëve”;
-Armand Gavelli, banues në Berat, i dënuar për veprën penale “Trafikimi i narkotikëve”, kryer në bashkëpunim.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
