Detaje tronditëse janë bërë publike mbrëmjen e sotme për ngjarjen e rëndë të ndodhur disa ditë ma parë në fshatin Bastar i Mesëm, ku një 34-vjeçar u vra me hekur pas koke, nga vëllai i të dashurës. Shkak për krimin është bërë lidhja jashtëmartesore e viktimës, me motrën e autorit, e cila gjithashtu ishte e martuar.
Emisioni “Dritare me Rudinën” ka risjellë në vëmendje këtë histori, ku njëra nga panelistet, gazetarja Etleva Delia ka treguar detaje të reja.
Sipas gazetares, “Policisë i është dashur 48 orë të zbulojë vrasjen, pasi autori, kunati i tij, bashkëpunëtor në krim, dhe vetë 20-vjeçarja që ishte në lidhje jashtëmartesore me viktimën, tentuan të fshihnin ngjarjen. E reja, E.Cani, pasi pa të plagosur 34-vjeçarin Arben Gjeçi njoftoi bashkëshortin e saj. Por ky i fundit për të shmangur thashethemet në fshat, dhe për të mbrojtur nderin, e mësoi si të fshihnin ngjarjen. Ai e largoi 34-vjeçarin nga vendngjarja, duke e lënë në një kanal jashtë fshatit, ndërsa bluzën me gjak të tij, e zhduku. Po kështu mësoi gruan e tij 20-vjeçare si të pastronte gjurmët e gjakut”.
Akoma dhe më tronditës është fakti, se sipas gazetares Delia, 34-vjeçari është gjetur nga banorë të fshatit në gjendje të rëndë shëndetësore, dhe ata duke menduar se isht i ngrirë nga i ftohti tentuan ta ngrohnin, duke mos e dërguar në kohë në spital. Kjo gjendje ka ndikuar që 34-vjeçari të mos i rezistojë plagëve të marra, pasi për shkak të goditjes me hekur në kokë, kishte hemorragji të vazhdueshme.
a.cupaj
