Dy të arrestuarit si të dyshuar për vrasjen e 47-vjeçarit Aleksandër Bardhi (Doda) nuk e kanë pranuar autorësinë e krimit. 29-vjeçari Fernando (Florin) Deda dhe 15- vjeçari Gj.A. kanë mbajtur qëndrim mohues para grupit hetimor. Gjatë marrjes në pyetje, ata kanë deklaruar se nuk mund të kryenin krim ndaj Aleksandrit, pasi kanë njohje dhe miqësi familjare. Ndërkohë, burime nga policia e Sarandës dje bënë me dije se dyshohet se personi që ka qëlluar për vdekje me automatik babain e dy fëmijëve është pikërisht 15-vjeçari. Mësohet se pranë banesës së minorenit është gjetur e groposur edhe një armë tip kallashnikov, e cila do të hedhë dritë mbi ngjarjen e ndodhur në fshatin Shëndëlli të Sarandës pas ekspertizës balistike.
Sipas burimeve të mësipërme, Gj.A. njihet si person problematik, por nuk ka qenë asnjëherë i skeduar. Ndërkohë që Fernando (Florin) Deda dyshohet të ketë qenë natën e krimit së bashku me 15-vjeçarin. Mësohet se ata të dy prej kohësh shoqëroheshin bashkë në fshatin në fjalë. Pavarësisht dyshimeve dhe akuzave të policisë, dy të arrestuarit kanë mohuar në mënyrë kategorike të jenë autorë të vrasjes së Aleksandër Bardhit. Paraditen e djeshme është zhvilluar ceremonia mortore e 47-vjeçarit. Në banesën e viktimës janë vënë re edhe familjarë të 15- vjeçarit Gj.A., të cilët kanë shkuar për ngushëllim. Burime konfidenciale bëjnë të ditur se edhe familjarët e minorenit nuk kanë pranuar që ai të ketë kryer krimin. Madje, pjesëtarë të familjes Arapi kanë pohuar se arma që u gjet e groposur afër banesës së tyre kishte ngelur aty që prej vitit 1997 dhe tashmë ishte ndryshkur. Do të jenë hetimet e mëtejshme që do të hedhin dritë mbi ngjarjen e rëndë, ku mbeti i vrarë vëllai i ish-kryekomunarit të Kaçinarit të Mirditës, Petrit Bardhit.
MASAT
Një ditë pas ngjarjes së ndodhur në fshatin Shëndëlli, policia e Sarandës ka marrë në mbrojtje familjen Deda dhe familjen Arapi. Kjo, për të shmangur hakmarrjen e mundshme nga ana e të afërmve të familjes së viktimës. Masat e policisë konsistojnë edhe në faktin se familjet mirditore që janë vendosur që në fillim të viteve ’90 në Sarandë vazhdojnë të ruajnë traditat e tyre. Blutë i tremben ndonjë gjakmarrjeje të mundshme. Mësohet se fisi i viktimës (Bardhi) dhe fisi Arapi janë dy prej fiseve më të mëdha në fshatin Shëndëlli.
BW/d.i.
