Zbardhet dëshmia në polici e 66 vjeçarit Faik Buci i arrestuar për vrasjen e vajzës së tij. Ai pretendon se e bija është gjallë por është trafikuar.
“Eshtrat në Malin me Gropa nuk i përkasin vajzës time. Eglantina është gjallë dhe është prostitutë. Unë e kam mohuar si fëmijë. Edhe sot po të më dalë para e vras”, ka deklaruar ai në polici në dëshminë e publikuar nga News 24.
“Edhe sot po të më dalë para e vras”, shton ai.
23 vjeçarja Eglantina Buci u zhduk pa gjurmë në vitin 2012. Për këtë krim, policia akuzon shtetasit Faik Buci dhe Shkëlzen Buci, përkatësisht babai dhe vëllai i viktimës.
“Motivi i vrasjes së bërë nga babai dhe vëllai i saj lidhet me faktin që shtetasja Eglantina Buci është larguar nga banesa për të bashkëjetuar me një shtetas tjetër, pa dëshirën e familjarëve të saj”, sqaronte policia të premten.
Aktualisht, vëllai i saj, është duke vuajtur dënimin me 13 vite burgim për vrasje në tentativë. (Panorama)
