Robert Rama, i cili mbeti i vrarë dy ditë më parë në zonën e ish-Kënetës në Durrës, dyshohet se mund të jetë ekzekutuar nga vrasës me pagesë. Ky është konkluzioni i Policisë së Durrësit, e cila po punon për identifikimin e autorëve, të cilët u larguan në drejtim të paditur menjëherë sapo u siguruan se 31-vjeçari ndërroi jetë.
Mësohet se për vrasjen po hetohen të gjitha pistat e mundshme për të gjetur shkakun e ekzekutimit të 31-vjeçarit nga Kurbini, por zbardhja e kësaj ngjarjeje konsiderohet shumë e vështirë për vetë faktin se Rama ka një të kaluar shumë problematike.
Sipas Policisë, 31-vjeçari, i cili u ekzekutua me plumb në kokë nga dy persona që lëviznin me motor, është përfshirë në konflikte të shumta në qytete të ndryshme të vendit, si dhe ka kryer disa grabitje me armë e dhunë, një pjesë e të cilave është mësuar nga të dëmtuarit. Veç emrit, Rama ka ndërruar disa herë vendbanimet, për shkak se ishte person i shpallur në kërkim dhe gjithashtu kërkohej nga kundërshtarët, me të cilët ka pasur konflikte.
Kohët e fundit 31- vjeçari banonte në Tiranë, ndërsa prej dy muajsh kishte marrë një banesë me qira në Durrës, në zonën e njohur si ura e Dajlanit, pak metra larg vendit ku u vra. Shkaku përse Robert Rama ndodhej në vendin ku edhe u ekzekutua ka të bëjë me faktin se e frekuentonte atë lagje, pasi ishte larg syve të Policisë, e cila e kishte shpallur në kërkim prej disa kohësh.
Rama kishte zënë shoqëri me djemtë e lagjes dhe i druhej ndonjë rasti sikurse ai i mbrëmjes së të hënës. Për këtë, ai mbante gjithmonë me vete një armë zjarri pistoletë, me qëllim që të vetëmbrohej, por masat e marra nuk rezultuan efikase. Policia dyshon se kemi të bëjmë me një ekzekutim profesionist, pasi autorët nuk kanë lënë asnjë shenjë në vendin e ngjarjes.
