Një 30-vjeçar u dorëzua sot më 18 dhjetor 2025 në polici në Kalamata, lidhur me vrasjen e dyfishtë që ndodhi në Finikounda në fillim të muajit tetor, ku viktima ishin pronari i një kampingu dhe një punëtor me origjinë shqiptare. Sipas mediave ndërkombëtare, ndaj tij kishte një urdhër-arrest ndërkombëtar, ndërsa akuzohet për bashkëpunim në kryerjen e krimit dhe për dhënie udhëzimesh për shkuarjen e autorit në vendngjarje.
Pak ditë më parë, nipi i pronarit të kampingut, 68-vjeçar, dhe një mik i tij biznesmen nga Athina u arrestuan pas urdhër-arresteve të lëshuara nga prokuroria në kuadër të hetimeve për vrasjen e dyfishtë. Të dy akuzohen për nxitje dhe përfshirje në kryerjen e krimit. Autoritetet ishin në kërkim të 30-vjeçarit, mik i biznesmenit të arrestuar, pasi dyshohej për pjesëmarrje në planifikimin dhe organizimin e ngjarjes. Ky është arrestimi i pestë, pasi më parë për këtë rast ishin arrestuar edhe dy persona të tjerë.
Nipi dhe shoku i tij janë mbajtur në paraburgim. Gjatë mbrojtjes së tij, nipi përsëriti deklaratat e mëparshme si dëshmitar, duke mohuar çdo përfshirje në ngjarje. Ai u deklarua i pafajshëm, duke theksuar se që nga fillimi ka bashkëpunuar me autoritetet dhe se akuzat që i atribuohen janë rezultat i një kombinimi rastësish, raporton Protothema.
Nga ana e tij, biznesmeni nga Athina, mik i ngushtë i nipit dhe bashkë-menaxher i kampingut, insistoi në pafajësinë e tij, duke theksuar se ndodhet padrejtësisht në pozitën e të akuzuarit. Ai përsëriti gjithashtu qëndrimet e tij të mëparshme, duke theksuar se nuk ka pasur asnjë përfshirje në krim dhe se dëshiron zbardhjen e plotë të ngjarjes.
Ky rast ka shkaktuar tronditje në komunitetin lokal të Finikoundas, ndërsa hetimet vijojnë dhe autoritetet nuk përjashtojnë mundësinë e arrestimeve të tjera, ndërsa përpiqen të zbardhin çdo detaj lidhur me motivet dhe bashkëpunëtorët e mundshëm të vrasjes së dyfishtë.
