Zv.ministrja e Brendshme, Rovena Voda ka deklaruar në emisionin “Repolitix’ se beson shumë se në një kohë të shkurtër do të mbyllet me sukses operacioni për gjetjen e trupit të Jan Prengës dhe kapjen e Altin Hajrit, që është një nga personat në kërkim. Voda theksoi se deri më tani nuk ka asnjë gjë konkrete për këtë ngjarje.
“Nëse do të kishim gjë konkrete do të ishte bërë e ditur nga policia, por më vjen mirë që si rrëmbim u zbardh, tani mbetet për të vepruar për trupin, por do të shohim. Besoj se do të mbyllet me sukses në një kohë të shkurtër edhe gjetja e trupit edhe të kërkuarin“, tha Voda.
Rrëmbimi i Prengës u zbardh nga Policia e Shtetit 4 ditë më parë, ku u dhanë detaje për operacionin që u zhvillua në Shijak. 49-vjeçari i rrëmbyer, ndërroi jetë 7 orë pasi u mor peng dhe u varros në rrethinat e resortit. Rrëmbimi i Prengës ka ndodhur si pasojë e një konflikti për 283 kilogram kokainë, që i vëllai, Astriti nuk iu dha personave të mësipërm. Droga doli nga porti, por nuk shkoi kurrë në destinacion… Burime bëjnë me dije se Astriti nuk e dinte se e kujt ishte droga dhe në fakt mendonte se ia kishte marrë një anglezi. Pas një telefonate me Gramoz Rexhepin nga burgu i Ekuadorit, Astriti ka kuptuar gjithçka dhe ka kthyer pjesën që ai kishte marrë në vend. Por 110 kg kokainë nuk e ktheu sërish në jetë Prengën, i cili kishte kohë që kishte vdekur.
/a.r
