Në atentatin që i mori jetën ish-drejtorit të Policisë së Vlorës Artan Cuku, kanë marrë pjesë së paku dy autorë që e kanë qëlluar me dy armë të ndryshme.
Burime nga grupi hetimor thanë dje se nga këqyrja e vendit të ngjarjes, provat e gjetura dhe këqyrja e kamerave të sigurisë, kanë arritur të ndërtojnë dinamikën e krimit që i mori jetën komisarit.
Ndaj Artan Cukut është qëlluar 7 herë me dy pistoleta, por nga këqyrja e vendit të ngjarjes, rezulton se dy predha të kalibrit 9 mm kanë goditur murin.
Njëri prej atentatorëve ka qëndruar brenda hyrjes së pallatit, i ulur në shkallë, ndërsa tjetri jashtë pallatit, duke vëzhguar lëvizjet e Cukut.
Autorët dyshohet se kanë komunikuar me njëri-tjetrin me mesazhe, ai që ishte jashtë duke informuar bashkëpunëtorin brenda.
QESJA ME RROBA
Policia ka kryer edhe gjatë ditës së djeshme kontrolle në zonën përreth vendit të ngjarjes.
Në kërkim të armëve të krimit, duke dyshuar se mund të jenë hedhur diku nga atentatorët, efektivët e rendit kanë gjetur një qese me rroba të hedhur pas Postës nr.8.
Duke dyshuar se ato mund të jenë rrobat e ndonjërit prej autorëve, ato janë dërguar për analiza shkencore në Laboratorin e Kriminalistikës./panorama
c.a
