Gazetari Sokol Bregu, i ftuar në emisionin “Të Paekspozuarit” në MCN TV, ka folur për ekzekutimin e Gilmando Danit, pak metra larg aeroportit të Tiranës.
Bregu tha se pagesa për këtë vrasje, ka gjasa të jetë shumë e lartë, për shkak të profilit të Gilmando Danit në botën e krimit, por shtoi se vrasësit kanë bërë disa gabime gjatë ekzekutimit, që mund t’i zbulojnë.
“Financiarisht, për ta realizuar shifrat janë shumë të larta, ai që e ka marrë përsipër. Nuk dua të vë përcaktim. Kam përshtypjen që i afrohet, shifrës një miliardë lek. Nuk e merr njeri përsipër këtë lloj vrasje. Nuk vret njeri më të afërtin e Shullazit për 100 mijë euro. Duhen shumë para për t’u shpenzuar, për të krijuar një skemë vrasje të tillë. Pse u zgjodh Rinasi? Gilmando Dani banonte në një zonë ku nuk futet dot njeri të kryejë aktin kriminal. Vetëm kur të zbriste nga avioni mund ta vrisnin.
Për të mos rënë në sy, nuk e prisnin miqtë e tij që mund të jenë të armatosur, por zbret me një makinë, që ka menduar nuk do të ketë njeri informacion. Pjesa e sigurisë, duke menduar se po udhëton me agjent të AMP, nuk do të ketë probleme.
Për mua personat që e kanë kryer nuk mendoj se i përkasin një grupi vrasësish që e kanë kryer këtë edhe më parë, përjashtuar atë guximin e tepruar si i afrohen automjetit, por nuk kam parë vrasës që i bllokohet arma dy herë. Ata kanë patur frikë duke ditur se kë po qëllojnë, duke ditur që ka një emër dhe vrasësi krijon emocion edhe me viktimën. Ai ka emër shumë të madh në emrat brenda grupeve kriminale.
Kanë frikë prandaj qëllojnë nga larg dhe të gjithë me kallashnikov. Veprimet e tyre, jo që nuk kanë qenë ndonjëherë, por ata rrëshqasin, u bien armët, duhet të kenë lënë gjurmë pafund në vendngjarje, makina nuk është djegur plotësisht. Ka shumë mundësi të identifikohen.
Kallashnikovi që kanë përdorur, edhe ai që e prodhoi u bë pishman, pasi edhe një fëmijë po qëlloi, vret. Ka një plumb aq të madh në diametër, sa po të kapi të vret. Kjo është saktësia e madhe, ai afrohet për të patur siguri, por të përdorësh kallashnikov në vendngjarje dhe të thuash është profesionist, habitesh”, tha ndër të tjera Bregu.
