Denis Shtraza, një prej të dyshuarve kryesorë për rrëmbimin dhe më pas vrasjen e Gazmend Çollakut, nuk ka lidhje me gjurmët e gjakut që u gjetën në automjetin e shtetasit Ervin Dalipaj, me të cilin udhëtonte Denis Shtraza.
Kjo sipas ekspertizës së ADN-së. “Gazeta Shqiptare” ka arritur të sigurojë një kopje të rezultateve të ADN-së, ku thuhet se: “Drejtoria e policisë së qarkut Durrës ka sjellë në cilësinë e provës materiale njollat e gjakut në fashetat plastike me ngjyrë të zezë, marrë gjatë këqyrjes së kufomës së shtetasit Leart Çollaku”, ndërsa në konkluzione thuhet se “profili gjenetik i përfituar nga kampioni i pështymës së shtetasit Denis Shtraza (provë material 1), model krahasimi i këtij ekspertimi, është i ndryshëm nga profili gjenetik i përfituar nga gjaku në fashetat plastike (provë material 1).
Ky është dokumenti i ekspertimit biologjik të ADN-së që Policia Shkencore ka hartuar pas kërkesës së drejtorisë së policisë së Durrësit për këtë ngjarje.
Gazmend (ose Laert) Çollaku, u mor peng mbrëmjen e 6 janarit në qytetin e Durrësit nga persona që mbanin veshur uniforma policie, ndërsa vetëm një ditë më pas u gjet i vrarë në fshatin Murqin të Krujës. Viktima ishte i lidhur në këmbë e duar dhe ishte qëlluar më pas në kokë.
Pas kësaj Prokuroria e Krimeve të Rënda filloi hetimet, të cilat po vijojnë për veprat penale të parashikuara nga nenet 109-3-25 dhe 278/5 të Kodit Penal, “Rrëmbim ose mbajtje peng i personit, kryer në bashkëpunim” si dhe “Prodhim dhe mbajtje pa leje e armëve luftarake dhe municionit” në ngarkim të shtetasit Denis Shtraza. Prokuroria gjithashtu ka urdhëruar kryerjen e analizës së ADN-së për të përcaktuar nëse njollat e gjakut i përkasin ndonjërit nga dy të dyshuarit, Shtrazës apo Dalipajt. a.k
