Policia e Shtetit dhe Prokuroria vijojnë veprimet për zbardhjen e atentatit të tipit mafioz të ndodhur një ditë më parë në autostradën Tiranë-Durrës, ku u vranë me breshëri kallashnikovi Ervin Dalipaj dhe Juxhin Dautaj teksa udhëtonin me një automjet.
Policia ka shoqëruar gjatë orëve të natës të paktën 15 persona që dyshohet se mund të kenë dijeni për ngjarjen e rëndë kriminale. Mes personave të shoqëruar ka edhe shtetas me precedentë të mëparshëm penalë.
Të dy viktimat, janë akuzuar në të shkuarën për vrasje. Ish-shefi i sektorit të Krimit Ekonomik në Policinë e Tiranës, Ervin Dalipaj, akuzohet për rrëmbimin, torturimin dhe vrasjen e shtetasit Gazmend (Laert) Çollaku në fillim të vitit të shkuar. Për këtë ngjarje ai ishte në kërkim, madje ditën që u vra ishte seanca ndaj tij në Gjykatën e Krimeve të Rënda.
Edhe shtetasi Juxhin Dautaj, është akuzuar për vrasjen e një shoku të tij në Mars të vitit 2012 në qytetin e Vlorës. Për këtë ngjarje ai u shpall i pafajshëm në gjykatë.
Pikërisht pista e hakmarrjes është edhe drejtimi kryesor ku janë fokusuar hetimet e prourorisë dhe policisë. Mësohet se mes të shoqëruarve, janë edhe miq e të afërm të personave të vrarë, krime për të cilat janë akuzuar Dautaj dhe Dalipaj raporton JavaNews.
Pista dytë ku janëpërqendruar veprimet e grupit hetimor është e shkuara e dy viktimave. Sipas dyshimeve, ata janë përfshirë në trafiqe dhe mendohet se një mosmarrëveshje mes grupimeve mund të jetë bërë shkak për eliminimin e tyre.
Ndërkohë, policia nuk ka mundur ende të identifikojë autorët e krimit. Dyshohet se ata janë vrasës me pagesë profesionistë, duke parë edhe mënyrën e kryerjes së atentatit. Janë skuestruar të gjitha kamerat e sigurisë gjatë rrugës që kanë përshkuar të dy mjetet, si ai i viktimave po ashtu edhe ai i autorëve./JavaNews/a.m.
