Policia e Shtetit pas një viti është shumë pranë zbardhjes së vrasjes së Artan Santos, i vrarë në qendër të kryeqytetit teksa po hynte në zyrën e tij.
Ky fakt është konfirmuar nga zëvendësdrejtori i Përgjithshëm i Policisë së Shtetit për hetimin e krimeve Ardian Çipa.
Ai konfirmoi për A1 Report se ka një intensifikim të veprimeve nga 3 grupet hetimore të cilat në bashkëpunim me prokurorinë kanë arritur të ngushtojnë rrethin e autorëve të dyshuar.
Çipa po ashtu tha se finalizimi i veprimeve pritet të ketë një rezultat konkret për prangosjen e autorëve të dyshuar, të cilët rezultojnë të jenë dy shtetas shqiptar vrasës me pagesë.
Identiteti i tyre nuk bëhet i ditur për shkak të sekretit hetimor, ndërsa disa përgjime të muajit korrik kanë nxjerrë në pah se ata janë shqiptar dhe ekzekutimi i Santos dyshohet se ka qenë i porositur.
Bankieri Artan Santo u qëllua me armë zjarri pistoletë mëngjesin e 26 qershorit të vitit të kaluar, kur sapo kishte zbritur nga vetura e tij.
