Vrasja e Agron Xhezairit në Ksamil është kryer për hakmarrje. Policia e Shtetit thotë se 53-vjeçari është vrarë për tu hakmarrë për shkak të vrasjes që ka bërë djali i tij Albi Xhezairi në 24 shtator. 20-vjeçari është në kërkim nga Policia por deri më tani ka arritur t’i shpëtojë Policisë. Burime të Report TV bëjnë me dije se Albi Xhezairi menjëherë pas vrasjes se Aleksandër Bardhit është larguar në drejtim të Greqisë.
Autorët që i kanë bërë atentat Agron Xhezairit, nuk kanë arritur të gjejnë djalin e 53-vjeçarit dhe kjo ka qenë arsyeja që i kanë bërë atentat babait të tij. Nëse në 30 tetor Agron Xhezairi i shpëtoi atentatit, ditën e djeshme autorët e kanë qëlluar disa herë me automatik, duke i shkaktuar vdekjen. Burime nga Policia e Sarandës thotë se ka qenë një person i cili qëlloi ndaj 53-vjeçarit, ndërkohë që një tjetër e priste për ta ndihmuar në mënyrë që të largoheshin me shpejtësi nga vendi i ngjarjes. Autorët kanë përdorur një motor për tu larguar.
Agron Xhezairi është qëlluar disa herë me automatik te dera e shtëpisë. Ai doli për të lidhur qenin e tij dhe në këtë moment autori ka qëlluar disa herë me automatik. Pavarësisht se 53-vjeçari tentoi të futej brenda në shtëpi, ai nuk ka mundur pasi autori është afruar dhe e ka qëlluar përsëri. Vrasje në Ksamil ndodhi në sy të vajzës së mitur të Agron Xhezairit, ndërkohë që afër vendit të ngjarjes ishte edhe kunata e tij.
Pavarësisht se gjatë natës Policia e Sarandës bëri kontrolle në zonë, nuk u arrit të kapen autorët. Mendohet se pas vrasjes autorët janë larguar në drejtim të fshatrave Xarrë dhe Mursi. Përplasje mes dy familjeve deri më tani ka sjellë dy vrasje. Albi Xhezairi bashkë me dy persona të tjerë vranë Aleksandër Bardhin në 24 shtator të këtij viti. Kjo vrasje erdhi për shkak të konflikteve për kanabisin. Policia deri më tani ka shoqëruar disa persona, ndërkohë që pritet të merren në pyetje edhe familjarët e Aleksandër Bardhit.
